वीरगंज । राष्ट्रिय स्वतन्त्र पार्टी (रास्वपा) ले बुझाएको समानुपातिक उम्मेदवारको सूचीप्रति जेन–जी आन्दोलनका अभियन्ता अर्जुन साहले कडा असहमति जनाएका छन्।
समानुपातिक प्रतिनिधित्वको मूल मर्म सबै क्षेत्र, वर्ग, जात, लिङ्ग र भौगोलिक विविधतालाई सुनिश्चित गर्नु भए पनि हाल सार्वजनिक गरिएको सूची त्यसको ठाडो विपरीत रहेको साहको आरोप छ। उनका अनुसार सूचीमा सत्ता केन्द्रसँग नजिकका, चितवन र सुनसरीका झोले, कुर्सी आसपासका व्यक्ति, परिवारका ससुरा र आसेपासेका अनुहारहरूको बाहुल्यता देखिएको छ, जुन जेन–जी आन्दोलन र नेपाली जनताको घोर अपमान हो।
समानुपातिक ११० जनाको सूचीमा कम्तीमा ७७ वटै जिल्लाबाट एक–एक प्रतिनिधि समावेश गरिएको भए अझ उपयुक्त हुने साहको भनाइ छ। साथै, गरीब, सीमान्तकृत, ग्रामीण तथा पछाडि पारिएका समुदायलाई प्राथमिकताका साथ प्रतिनिधित्व गरिनुपर्नेमा उनले जोड दिएका छन्।
“देशको प्रतिनिधित्व चितवन, सुनसरी, सिराहा, सप्तरी र महोत्तरीमा मात्र सीमित हुन सक्दैन, यो नेपालको हरेक कुनाबाट हुनुपर्छ,” साहले भने।
जेन–जी आन्दोलनको मूल उद्देश्य शक्ति र कुर्सी प्राप्ति नभई भ्रष्टाचारविरुद्ध, समावेशी लोकतन्त्रको पक्षमा, राजनीतिक नियुक्ति र ‘नेपो किड्स’ प्रवृत्तिको विरोध तथा प्रणालीगत समानताको लागि रहेको उनले स्पष्ट पारे।
“समानुपातिक प्रणालीमै असमानता स्वीकार्य हुँदैन,” साहको भनाइ छ।
