वीरगंज । पर्साको कालिकामाई गाउँपालिकाका अध्यक्ष बशिष्ट कुमार गुप्ताले युवाहरूको चाहनाअनुसार खेलकुद सामग्री सहयोग गर्दै खेलकुद क्षेत्रप्रति युवालाई प्रोत्साहन गरेका छन्।
आइतबार कालिकामाई गाउँपालिका अन्तर्गतका युवाहरूका लागि अध्यक्ष गुप्ताले ब्याडमिन्टन, केरम बोर्ड, भलिबललगायत विभिन्न खेल सामग्री हस्तान्तरण गरेका हुन् । युवाहरूको रुचि र आवश्यकतालाई ध्यानमा राखेर सामग्री प्रदान गरिएको बताउँदै उनले खेलकुदले युवालाई स्वस्थ, अनुशासित र सकारात्मक दिशातर्फ अघि बढाउन सहयोग पुर्याउने विश्वास व्यक्त गरे।
अध्यक्ष गुप्ताले युवाप्रति आफ्नो सद्भाव सधैं कायम रहने उल्लेख गर्दै युवाहरूको हकहित र विकासका लागि निरन्तर लागिरहने प्रतिबद्धता जनाए। “युवा भाइहरूप्रति मेरो माया र सद्भाव सधैं रहिरहनेछ,” उनले भने।
यसअघि पनि अध्यक्ष गुप्ताले कालिकामाई गाउँपालिका भित्रका युवाहरूको एक समूहलाई क्रिकेट किट, ब्याडमिन्टन र केरम बोर्डलगायत खेल सामग्री सहयोग गरिसकेका छन् । स्थानीय युवाहरूले यस्तो सहयोगले खेलकुद गतिविधि बढ्ने र प्रतिभा विकासमा टेवा पुग्ने प्रतिक्रिया दिएका छन्।
