वीरगंज । भारतीय महावाणिज्य दूतावास, वीरगंजद्वारा विश्व हिन्दी दिवस–२०२६ को अवसरमा आइतबार एक भव्य कार्यक्रम सम्पन्न भएकाे छ। कार्यक्रममा विभिन्न विद्यालयका विद्यार्थीहरूलाई लक्षित गरी भाषण तथा स्वरचित कविता प्रतियोगिता आयोजना गरिएको थियो। साथै शारदा कला केन्द्र, रक्सौलद्वारा प्रस्तुत सांस्कृतिक कार्यक्रमले उपस्थित दर्शकहरूको मन जितेको थियो।
कार्यक्रमलाई सम्बोधन गर्दै भारतीय महावाणिज्य दूत श्री देवी सहाय मीना ज्यूले हिन्दी भाषाको विश्वव्यापी महत्त्व तथा भारत–नेपालबीचको ऐतिहासिक सांस्कृतिक सम्बन्धलाई अझ सुदृढ बनाउन हिन्दी भाषाले खेलेको भूमिकामाथि प्रकाश पार्नुभयो। उहाँले यस अवसरमा भारतका प्रधानमन्त्री श्री नरेन्द्र मोदीज्यूको सन्देश वाचन गर्दै हिन्दी भाषा तथा भारतीय संस्कृतिलाई विश्वस्तरमा प्रवर्द्धन गर्न भारत सरकार प्रतिबद्ध रहेको स्पष्ट पार्नुभयो।
कार्यक्रममा विभिन्न विद्यालयका विद्यार्थीहरूले भारत र नेपालबीच युगौँदेखि कायम धार्मिक, सामाजिक तथा सांस्कृतिक सम्बन्धको महत्त्व विषयमा आयोजित भाषण तथा कविता प्रतियोगितामा उत्साहपूर्वक सहभागिता जनाएका थिए। विद्यार्थीहरूको भाषिक दक्षता र सिर्जनात्मक प्रस्तुतिले कार्यक्रमलाई थप प्रभावशाली बनाएको थियो।
प्रतियोगितामा उत्कृष्ट प्रस्तुति दिने विद्यार्थीहरूलाई भारतीय महावाणिज्य दूत श्री देवी सहाय मीना ज्यूले पुरस्कार प्रदान गर्नुभयो। कार्यक्रममा शैक्षिक संस्था, उद्योग तथा वाणिज्य क्षेत्रका प्रतिनिधि, भारत–नेपाल मैत्री संघका सदस्यहरू तथा ठूलो संख्यामा हिन्दी प्रेमीहरूको उल्लेखनीय उपस्थिति रहेको थियो।
कार्यक्रमको सफल आयोजनासँगै भारतीय महावाणिज्य दूतावास, वीरगंजले यस क्षेत्रमै हिन्दी भाषा र संस्कृतिको प्रवर्द्धन गर्दै भारत–नेपाल मैत्री सम्बन्धलाई अझ प्रगाढ बनाउने आफ्नो प्रतिबद्धता पुनः व्यक्त गरेको छ।
