वीरगंज । वीरगंज महानगरपालिका वडा नं. ३२ मा रहेको श्री दलित मुक्ति आधारभूत विद्यालय, रामबनमा अध्ययनरत साना विद्यार्थीहरूलाई लक्षित गर्दै न्यानो कपडा सहयोग गरिएको छ ।
श्री नेपाल रेल्वे माध्यमिक विद्यालयको २०७० सालको एसएलसी ब्याचका पूर्व विद्यार्थीहरूले जाडो मौसम र शीतलहरका कारण प्रभावित बालबालिकाका लागि ६० थान स्विटर तथा भेस्ट सहयोग स्वरूप प्रदान गरेका हुन्।
वीरगंज महानगरपालिकाको ग्रामीण भेगमा रहेको उक्त विद्यालयमा चिसो मौसमका कारण विद्यार्थीहरूलाई पठन–पाठनमा कठिनाइ भइरहेको विषय शिक्षक सन्तोष सर्राफमार्फत जानकारी पाएपछि सहयोगको पहल गरिएको एसएलसी ब्याचका सदस्य विक्की सर्राफले जानकारी दिए। उनले सामाजिक उत्तरदायित्वको भावनाले साना विद्यार्थीहरूको स्वास्थ्य र अध्ययनलाई ध्यानमा राखी न्यानो कपडा वितरण गरिएको बताए।
विद्यालय परिवारले यस्तो सहयोगले विद्यार्थीहरूलाई चिसोबाट जोगिनुका साथै नियमित अध्ययनमा उत्साह बढ्ने विश्वास व्यक्त गर्दै सहयोगी समूहप्रति आभार प्रकट गरेको छ।
