वीरगंज । जिल्ला प्रहरी कार्यालय पर्साले ४ केजी ५० ग्राम लागुऔषध गाँजा जस्तो देखिने पदार्थसहित एक जनालाई पक्राउ गरेको छ।
विशेष सूचनाको आधारमा आइतबार बिहान करिब ७ बजे वीरगंज महानगरपालिका वडा नं. १४ गण्डक चोकस्थित सडकखण्डमा सवारी साधन तथा पैदल यात्रुहरूको चेकजाँचका क्रममा प्रहरी चौकी गण्डक पर्साबाट खटिएको प्रहरी टोलीले साईकलमा सवार एक व्यक्तिलाई शंकास्पद रूपमा रोकी जाँच गरेको थियो।
जाँचका क्रममा वीरगंज महानगरपालिका वडा नं. २८ बगही निवासी ४५ वर्षीय राम सुरेश सहनीले कम्मरभन्दा माथिल्लो शरीरमा आकासे रंगको प्लास्टिकभित्र कालो धागोले सिलाई गरी सेतो टेपले बेरेर लुकाइछिपाई राखिएको अवस्थामा प्लास्टिकबाहेक ४ केजी ५० ग्राम लागुऔषध गाँजा जस्तो देखिने पदार्थ फेला परेको प्रहरीले जनाएको छ।
बरामद लागुऔषधसहित सहनीलाई नियन्त्रणमा लिई थप अनुसन्धान कार्य भइरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले जानकारी दिएका छन्।
