वीरगंज । वीरगंज युवा समाजले “परिवर्तनका लागि वीरगंज युवा समाज” नारासहित आयोजना गरेको रक्तदान कार्यक्रम सम्पन्न भएको छ। शनिवार वीरगंजस्थित होटेल मकालुमा सम्पन्न कार्यक्रममा १३ जना महिलासहित १०३ जनाले रक्तदान गरेका छन्।

रक्तदान गर्नेहरूमा काजल कोइराला, मिरा सिंह, रोजी प्रधान, स्वस्तिका श्रेष्ठ, मञ्जु भण्डारी, प्रीति गुरुङ, मञ्जु गुरुङ, सुन्दिपा श्रेष्ठ, दीपिका चापागाईँ, श्रीजल चौधरी, रञ्जना कार्की, सिद्धिका कार्की, सलिमा रोक्का, सञ्जीव थापा, राजेन्द्र भट्टराई, सन्दीप साह, रामकुमार बस्नेत, विवेक बेरिवाल, विनोद धिमाललगायतका रहेका छन् ।

कार्यक्रमका प्रमुख अतिथि पर्साका प्रमुख जिल्ला अधिकारी (सीडीओ) तोय नारायण सुवेदीले रक्तदान जीवन बचाउने अमूल्य योगदान भएको उल्लेख गर्दै प्रत्येक तीन महिनामा रक्तदान गर्न आग्रह गरे । उनले रक्तसञ्चार केन्द्रमा रगतको अभावका कारण बिरामीहरू समस्यामा परिरहेको बेला वीरगंज युवा समाजको अभियान महत्त्वपूर्ण रहेको बताए ।

समाजका अध्यक्ष तथा कार्यक्रमका सभापति सञ्जीव थापाको अध्यक्षतामा भएकाे कार्यक्रममा जिल्ला प्रहरी कार्यालय पर्साका प्रमुख एसपी गौतम मिश्र, सशस्त्र प्रहरी पर्साका एसपी पुरनचन्द्र भट्टलगायतले रक्तदातालाई प्रमाणपत्र प्रदान गरी सम्मान गरेका थिए ।

यसैगरी, बाराको सदरमुकाम कलैयास्थित भारत चौकमा कम्प्युटर एशोसियसन नेपाल महासंघ (क्यान) बाराको आयोजना तथा नेपाल रेडक्रस सोसाइटी पर्साको सहकार्यमा खुला रक्तदान कार्यक्रम सम्पन्न भएको छ ।

क्यान बाराका अध्यक्ष लक्ष्मण चौधरीको अध्यक्षतामा सम्पन्न कार्यक्रममा जिल्ला समन्वय समिति बाराका सभापति नरेन्द्र साह प्रमुख अतिथि रहनुहुँदै संयुक्त रूपमा रक्त सङ्कलन ब्याग हस्तान्तरण गरी उद्घाटन गरेका थिए। साे कार्यक्रममा ३० जनाले रक्तदान गरेको नेपाल रेडक्रस सोसाइटी पर्साले जनाएको छ।

वीरगंज । २२ औं निजामती सेवा दिवस–२०८२ को अवसरमा जिल्ला प्रशासन कार्यालय पर्सा तथा ग्रीन सिटी सामुदायिक प्रहरी सेवा केन्द्र, आदर्शनगर–१०, वीरगंजको संयुक्त आयोजनामा बृहत वृक्षारोपण कार्यक्रम सम्पन्न भएको छ।

कार्यक्रमका प्रमुख अतिथि पर्साका प्रमुख जिल्ला अधिकारी (सीडीओ) तोयनारायण सुबेदी रहनुभएको थियो । विशिष्ट अतिथिहरूमा मधेश प्रदेश कार्यालयका एसएसपी शान्ती राज कोईराला, जिल्ला प्रहरी कार्यालय पर्साका एसपी गौतम मिश्र, शस्त्र प्रहरी पर्साका एसपी पुरनचन्द्र भट्ट, जिल्ला प्रहरी कार्यालयका डिएसपी किशोर लम्सा लगायतको उपस्थिति रहेको थियो।

कार्यक्रमको अध्यक्षता ग्रीन सिटी सामुदायिक प्रहरी सेवा केन्द्र आदर्शनगर–१० का अध्यक्ष जय प्रकाश खेतानले गर्नुभएको थियो। उहाँका अनुसार कार्यक्रममा करिब ६० वटा विभिन्न प्रजातिका बिरुवा रोपिनुका साथै दीर्घकालीन संरक्षणका लागि लोहाको तारजाली (प्रोटेक्टिभ गार्ड) समेत जडान गरिएको छ।

वृक्षारोपण वीरगंज महानगरपालिका–१६ अन्तर्गत वाईपास रोडस्थित वैष्णवी मन्दिर चौक परिसरमा सम्पन्न भएको हो। सामाजिक दायित्व र वातावरण संरक्षणलाई प्रोत्साहन गर्ने उद्देश्यले आयोजना गरिएको कार्यक्रममा नागरिक समाजका प्रतिनिधि, समाजसेवी, बुद्धिजीवी, विभिन्न राजनीतिक दलका नेता–कार्यकर्ता, सुरक्षाकर्मी तथा सञ्चारकर्मीहरूको उल्लेखनीय सहभागिता रहेको आयोजकले जनाएको छ।