जनकपुरधाम । राष्ट्रिय स्वतन्त्र पार्टी (रास्वपा)का सभापति रवि लामिछानेले देशमा विद्यमान समस्या समाधानका लागि आफ्नो पार्टीलाई सहयोग गर्न आग्रह गर्नुभएको छ।
रास्वपाद्वारा आज जनकपुरधाममा आयोजित परिवर्तन उद्घोषसभालाई सम्बोधन गर्दै सभापति लामिछानेले देशको विकास गर्ने सङ्कल्पसहित पार्टी अघि बढेको उल्लेख गर्नुभयो। त्यसका लागि सबैको सहयोग र सद्भाव आवश्यक रहेको उहाँको भनाइ थियो।
सभापति लामिछानेले रास्वपा परिवर्तनको वाहक भएको जिकिर गर्दै प्रतिनिधिसभा सदस्य निर्वाचनमा पार्टीलाई बहुमतका साथ विजयी गराउन अपिल गर्नुभयो। “हामी देश विकासको सङ्कल्पसहित अगाडि आएका छौँ। आउँदो निर्वाचनमा पार्टीले सबैभन्दा बढी मत ल्याए त्यो पूरा गर्न सहज हुनेछ,” उहाँले भन्नुभयो।
उहाँले आफूविरुद्ध विगतका सरकारले धेरै मुद्दा तथा आरोप लगाएको उल्लेख गर्दै देश र जनताको मुद्दा बोकेको व्यक्तिलाई अन्य आरोपसँग खासै मतलब नहुने धारणा राख्नुभयो। देशको हितलाई केन्द्रमा राखेकै कारण आफू र बालेन साह एक ठाउँमा आएको उहाँको भनाइ थियो।
सभापति लामिछानेले बालेन साहसँगको सहकार्यप्रति आफू निकै उत्साहित रहेको बताउँदै यस अभियानमा साथ दिन सबैलाई आग्रह गर्नुभयो। कार्यक्रममा पूर्व स्वतन्त्र सांसद अमरेशकुमार सिंह र मधेस प्रदेशसभाका निवर्तमान सदस्य रहवर अन्सारी लगायतलाई पार्टीमा स्वागत गरिएको थियो।
