वीरगंज । निजी तथा आवासीय विद्यालय अर्गनाइजेसन नेपाल (प्याब्सन) पर्साले प्याब्सन पर्सा स्तरीय टि–२० नकआउट क्रिकेट तथा जुनियर फुटबल प्रतियोगिता आयोजना गर्ने भएको छ।
प्याब्सन पर्साले बुधबार वीरगञ्जस्थित टीबी साह क्रिकेट मैदान मा पत्रकार सम्मेलन गर्दै प्रतियोगिताबारे जानकारी दिएको हो। सम्मेलनमा प्याब्सन पर्साका सचिव अशोक सङ्ग्रौलाले क्रिकेट प्रतियोगितामा प्याब्सन पर्सासँग आवद्ध ४० वटा विद्यालय सहभागी हुने जानकारी दिए।
उनका अनुसार क्रिकेट प्रतियोगिता माघ ८ गते बिहीबारदेखि सुरु हुनेछ। सबै खेल १५–१५ ओभरका हुनेछन् र दैनिक ३ खेल सञ्चालन गरिनेछ। क्रिकेटतर्फ कक्षा १० सम्मका विद्यार्थी सहभागी हुन पाउनेछन्। क्रिकेट प्रतियोगिताको मुख्य प्रायोजन नेपाल मेडिसिटी हस्पिटलले गरेको छ।
यस्तै, जुनियर फुटबल प्रतियोगिता माघ १० गतेदेखि मधेश प्रदेश प्रहरी कार्यालय खेल मैदान मा आयोजना हुनेछ। फुटबलतर्फ २१ वटा विद्यालय सहभागी हुनेछन्। जुनियर फुटबलमा ४ फिट १० इन्चसम्म उचाइ भएका विद्यार्थीलाई मात्र सहभागी गराइने आयोजकले जनाएको छ। फुटबल प्रतियोगिताको प्रायोजन राज होजियारीले गरेको छ।
प्याब्सन पर्साका अध्यक्ष सरोज प्रसाद चौधरीले विद्यालयस्तरका प्रतिभावान खेलाडीलाई आफ्नो क्षमता प्रदर्शन गर्ने अवसर दिनुका साथै विद्यार्थीलाई खेलकुदतर्फ प्रेरित गर्ने उद्देश्यले प्रतियोगिता आयोजना गरिएको बताए। यस्ता प्रतियोगिताले प्रदेश हुँदै राष्ट्रिय तथा अन्तर्राष्ट्रिय स्तरका खेलाडी उत्पादनमा टेवा पुग्ने उनको विश्वास छ।
पुरस्कार विवरण
क्रिकेटतर्फ विजेताले नगद १५ हजार, दोस्रो हुने टिमले १० हजार र तेस्रोले ५ हजार रुपैयाँ नगदसहित ट्रफी, मेडल र प्रमाणपत्र प्राप्त गर्नेछन्। साथै प्रत्येक खेलका प्लेयर अफ द म्याच तथा अन्य विधागत उत्कृष्ट खेलाडीलाई पनि नगदसहित पुरस्कृत गरिनेछ।
फुटबलतर्फ विजेताले ८ हजार, दोस्रोले ६ हजार र तेस्रोले ४ हजार रुपैयाँ नगदसहित ट्रफी, मेडल र प्रमाणपत्र पाउनेछन्।
प्रतियोगिताको उद्घाटन सत्रलाई आकर्षक बनाउन ३० वटा विद्यालयको मार्चपास पनि समावेश गरिएको छ, जसमा विभिन्न भाषा, संस्कृति र भेषभूषा झल्किने आयोजकले जनाएको छ।
माघ ८ देखि २४ गतेसम्म सञ्चालन हुने प्रतियोगितामा सहभागी खेलाडीहरूको २५ हजार रुपैयाँ बराबरको बीमा गरिएको छ। प्रतियोगिता आयोजना गर्न करिब १२ लाख ७० हजार रुपैयाँ खर्च हुने अनुमान गरिएको छ।
प्याब्सन पर्साले विद्यार्थीलाई शैक्षिक गतिविधिसँगै खेलकुदमा पनि सक्रिय गराउने उद्देश्यले आगामी दिनमा यस्ता कार्यक्रमलाई निरन्तरता दिने जनाएको छ।
