वीरगंज । पर्सा निर्वाचन क्षेत्र नम्बर–२ मा नेपाली कांग्रेसबाट विद्रोह गर्दै स्वतन्त्र उम्मेदवारी दिएका राजेश्वर प्रसाद साहले आफ्नो उम्मेदवारी फिर्ता लिएका छन्। पूर्व प्रदेश सभा सदस्यसमेत रहेका साहले प्रतिनिधि सभा सदस्यका लागि कांग्रेसबाट टिकटको आकांक्षा राखेका थिए । तर पार्टीबाट टिकट नपाएपछि उनले माघ ६ गते स्वतन्त्र रूपमा उम्मेदवारी दर्ता गराएका थिए।
निर्वाचन आयोगले तोकेको उम्मेदवारी फिर्ता लिने समयसीमाभित्र शुक्रबार साहले निर्वाचन अधिकृतको कार्यालयमा पुगेर औपचारिक रूपमा उम्मेदवारी फिर्ता लिएका हुन् । यसबारे निर्वाचन कार्यालयले पनि पुष्टि गरेको छ।
पर्सा–२ बाट कांग्रेसले निवर्तमान सांसद अजयकुमार चौरसिया लाई पुनः उम्मेदवार बनाएको छ । कांग्रेसका उम्मेदवार चौरसिया तथा पार्टीका अन्य नेताहरूको आग्रहमा साहले उम्मेदवारी फिर्ता लिएको बुझिएको छ।
उम्मेदवारी फिर्ता लिने निर्णयबारे प्रतिक्रिया दिँदै साहले कसैको दबाब वा प्रभावमा नभई वर्तमान विषम परिस्थितिमा हुन गइरहेको निर्वाचनमा कांग्रेसलाई एकजुट बनाउने आवश्यकतालाई आत्मसात् गर्दै आफूले उम्मेदवारी फिर्ता लिएको बताएका छन् ।
उनले पार्टीको हित र संगठनको एकताका लागि यो निर्णय लिएको स्पष्ट पारेका छन् । यता साहले उम्मेदवारी फिर्ता लिएपनि उनका समर्थकहरु आक्राेशित भएका छन् । आक्राेशित उनीहरुले साहले उम्मेदवारी फिर्ता लिएर गलत गरेकाे भन्दै कांग्रेसका उम्मेदवारी चाैरसियाकाे प्रभावमा परेकाे लगायतकाे आराेप समेत लगाइरहेका छन् ।
