वीरगंज। निजी तथा आवासीय विद्यालय संगठन (प्याब्सन) पर्साको आयोजनामा बिहीबारदेखि अन्तर–विद्यालय स्तरीय क्रिकेट तथा फुटबल प्रतियोगिता सुरु भएको छ। टि.बि. साह क्रिकेट ग्राउन्ड वीरगंजमा सुरु भएको प्रतियोगिताको उद्घाटन नेपाल मेडिसिटी हस्पिटलका संस्थापक अध्यक्ष डा. उपेन्द्र महतोले गर्नुभएको हो।
उद्घाटन समारोहलाई सम्बोधन गर्दै अध्यक्ष महतोले निजी विद्यालयहरूले गुणस्तरीय शिक्षासँगै खेलकुद क्षेत्रमा पनि नयाँ आयाम ल्याउन सक्ने बताउनुभयो। उहाँले शिक्षा र खेलकुदलाई पहिलो प्राथमिकतामा राख्दै राष्ट्रिय तथा अन्तर्राष्ट्रिय स्तरका खेलाडी उत्पादन गर्ने थलोका रूपमा प्याब्सनले निरन्तर योगदान गर्दै आएको उल्लेख गर्नुभयो।
“खेलकुद कार्यक्रमले विद्यार्थीहरूमा अनुशासन कायम राख्न र उनीहरूलाई स्वस्थ तथा फुर्तिलो बनाउन ठूलो सहयोग पुग्छ,” उहाँले भन्नुभयो। साथै, नेपालको शिक्षा विदेशभन्दा कम नभएकाले देशको विकासका लागि हामी आफैं लाग्नुपर्नेमा उहाँले जोड दिनुभयो।
प्याब्सन पर्साका अध्यक्ष सरोज चौधरीको अध्यक्षतामा सम्पन्न उद्घाटन समारोहमा पर्साका प्रमुख जिल्ला अधिकारी भोला दाहाल, मधेस प्रदेश खेलकुद परिषद्का सदस्य–सचिव शिवजी गुप्तालगायतले शुभकामना मन्तव्य राख्नुभएको थियो।
कार्यक्रममा प्याब्सन मधेस प्रदेशका अध्यक्ष गणेश साह, क्यानका केन्द्रीय सदस्य आयुष श्रेष्ठ, मधेस प्रदेश अध्यक्ष सुनील महतो, प्याब्सन केन्द्रीय शैक्षिक परिषद् सदस्य हरिशंकर साह, केन्द्रीय सदस्य छेदुप लामा, वीरगंज महानगरपालिकाका प्रमुख प्रशासकीय अधिकृत अरविनलाल कर्ण, शिक्षा महाशाखा प्रमुख आनन्द लामिछाने, सशस्त्र प्रहरी बल नेपाल १३ नं. गणका गणपति पुरनचन्द्र भट्ट, प्याब्सन मधेस प्रदेशका सल्लाहकार मनिपाख्रिन, लालबाबु पटेल, इमामोदिन अहमद तथा प्याब्सन वीरगंज महानगर अध्यक्ष राहुल श्रीवास्तवलगायतको उपस्थिति रहेको थियो।
उद्घाटन समारोहअन्तर्गत आयोजित मार्चपास प्रतियोगितामा न्यू वेभ एकेडेमी प्रथम, साउथ जोन सेकेन्डरी स्कुल द्वितीय, लिटिल एन्जल्स स्कुल तृतीय, मनकामना स्कुल चौथो, मालिनी एकेडेमी पाँचौं, गौतम स्कुल छैठौं र बिकन इङ्लिस स्कुल सातौं स्थानमा रहन सफल भए।
वक्ताहरूले खेलकुदले विद्यार्थीहरूको शारीरिक, मानसिक तथा अनुशासनात्मक विकासमा महत्वपूर्ण भूमिका खेल्ने उल्लेख गर्दै शैक्षिक विकाससँगै खेलकुदलाई पनि समान प्राथमिकता दिनुपर्नेमा जोड दिएका थिए।
प्रतियोगितामा पर्सा जिल्लाका विभिन्न विद्यालयहरूले क्रिकेट र फुटबल दुवै विधामा सहभागिता जनाएका छन्। आयोजक प्याब्सन पर्साले यस्ता प्रतियोगितामार्फत विद्यार्थीहरूको प्रतिभा उजागर गर्दै स्वस्थ प्रतिस्पर्धाको वातावरण सिर्जना गर्ने उद्देश्य लिएको जनाएको छ।
प्रतियोगिताको पहिलो खेलमा गुरुकुल एकेडेमी स्कुललाई १० विकेटले पराजित गर्दै सेन्जेभिएसले विजयी सुरुवात गरेको छ। उक्त खेलको ‘म्यान अफ द म्याच’ उपाधि शेख अनिसु रहमानले प्राप्त गर्नुभएको प्याब्सन सचिव अशोक संग्रौलाले जानकारी दिनुभयो।
