वीरगंज । पर्सा निर्वाचन क्षेत्र नम्बर २ बाट स्वतन्त्र उम्मेदवारी दिएका राजेश्वर साहले परिवर्तन, सुशासन र विकासको एजेन्डासहित चुनावी मैदानमा उत्रिएको बताएका छन्।
अगामी फागुन २१ गते हुने प्रतिनिधि सभा सदस्य निर्वाचनमा स्वतन्त्र उम्मेदवारी दिएका पूर्व प्रदेश सभा सदस्य साहले लामो समयदेखि एउटै व्यक्तिले यस क्षेत्रको नेतृत्व गर्दै आएपनि अपेक्षित विकास हुन नसकेकाले आफू परिवर्तनका लागि स्वतन्त्र रूपमा उम्मेदवारी दर्ता गराएको स्पष्ट पारे।
उनले भने, “देशमा सुशासन कायम होस्, विकासले गति लियोस् भन्ने मेरो मुख्य उद्देश्य हो । मुलुकमा बढ्दै गएको बेथिति र दलाली प्रथाको अन्त्यका लागि मैले उम्मेदवारी दिएको हुँ ।”
साहले आफू प्रदेश सभा सदस्य हुँदा क्षेत्रका सडक, आधारभूत पूर्वाधार र जनसरोकारका कामहरू अघि बढाएको उल्लेख गर्दै सोही कामको मूल्याङ्कन गर्दै क्षेत्रवासीले यसपटक पनि आफूलाई मतदान गरी विजयी गराउनेमा विश्वस्त रहेको बताए ।
उनका अनुसार जनताको प्रत्यक्ष सहभागिता, पारदर्शी विकास र जवाफदेही नेतृत्व नै पर्सा–२ को समृद्धिको आधार हो, र त्यसका लागि स्वतन्त्र उम्मेदवारी नै सही विकल्प भएको दाबी गरे ।
