वीरगंज। सशस्त्र प्रहरी बल, नेपालको स्थापना दिवसको अवसरमा सीमावर्ती क्षेत्रमा आयोजना गरिएको फ्ल्याग मार्च बारा जिल्लाबाट पर्सा जिल्लासम्म भव्य रूपमा सम्पन्न भएको छ । देशको सीमा सुरक्षा, राष्ट्रिय एकता तथा सुरक्षाप्रतिको प्रतिबद्धता सन्देश प्रवाह गर्ने उद्देश्यले आयोजना गरिएको उक्त कार्यक्रमलाई सहभागीहरूले ऐतिहासिक र अर्थपूर्ण रूपमा लिएका छन्।
फ्ल्याग मार्च कार्यक्रमको नेतृत्व पुरण चन्द भट्टले गरेका थिए । सीमावर्ती क्षेत्र हुँदै सम्पन्न मार्चले सुरक्षा निकायहरूको सतर्कता, अनुशासन र आपसी समन्वयलाई प्रत्यक्ष रूपमा उजागर गरेको सहभागीहरूको भनाइ रहेको छ।
कार्यक्रमकाे प्रमुख अतिथीकाे रुपमा पर्साका प्रमुख जिल्ला अधिकारी भाेला दाहालकाे उपस्थिती रहेकाे थियाे । साथै जिल्ला प्रहरी कार्यालय पर्साका प्रहरी उपरीक्षक सुदिप राज पाठक, राष्ट्रिय अनुसन्धान कार्यालय पर्साका प्रमुख सन्तोष ढकाल, सशस्त्र प्रहरी बल तथा नेपाल प्रहरीका विभिन्न तहका पदाधिकारीहरू र भारतीय सीमा सुरक्षा बल एसएसबिका अधिकारीहरूको समेत सहभागिता रहेको थियो।
सीमावर्ती क्षेत्रमा आयोजित फ्ल्याग मार्चले नेपाल–भारत सीमा क्षेत्रमा आपसी विश्वास, सहकार्य र सुरक्षा समन्वयलाई थप मजबुत बनाउने विश्वास व्यक्त गरिएको छ । कार्यक्रमले आम नागरिकमा सुरक्षा अनुभूति बढाउनुका साथै सशस्त्र प्रहरी बलको भूमिका र जिम्मेवारीप्रति सकारात्मक सन्देश प्रवाह गरेको सहभागीहरूको प्रतिक्रिया रहेको छ।
देशप्रेम, अनुशासन र राष्ट्रिय सुरक्षाप्रतिको अटल प्रतिबद्धताको प्रतीकका रूपमा सम्पन्न यो फ्ल्याग मार्च सशस्त्र प्रहरी बलको इतिहासमा स्मरणीय क्षणका रूपमा रहने आयोजक पक्षले जनाएको छ।
