कलैया । राष्ट्रिय स्वतन्त्र पार्टी (रास्वपा)बाट बारा निर्वाचन क्षेत्र नम्बर ३ मा प्रतिनिधिसभा सदस्य पदका उम्मेदवार ई. अरविन्द साहले कलैया उपमहानगरपालिकाका विभिन्न वडाहरूमा घरदैलो अभियान सञ्चालन गर्दै स्थानीय मतदातासँग प्रत्यक्ष भेटघाट गर्नुभएको छ।

मङ्गलबार बिहानैदेखि सुरु भएको घरदैलो अभियानअन्तर्गत उहाँले वडा नम्बर २१, २२ र २६ मा पुगेर स्थानीयसँग संवाद गर्नुभएको हो। अभियानका क्रममा उहाँले विगतका जनप्रतिनिधिहरूले जनताको अपेक्षा अनुसार काम गर्न नसकेको भन्दै अब परिवर्तन आवश्यक रहेको धारणा राख्नुभयो।

वडा नम्बर २१ को मडील्वामा आयोजित भेटघाट कार्यक्रममा ई. साहले यस क्षेत्रबाट निर्वाचित भइसकेका जनप्रतिनिधिहरूको कार्यसम्पादनको समीक्षा गर्दै जनताको समस्या समाधान हुन नसकेको बताउनुभयो। “अब सुरक्षित भविष्य र वास्तविक परिवर्तन चाहियो भने घण्टी छापमा मतदान गरेर रास्वपालाई जिताउनुहोस्,” उहाँले आग्रह गर्नुभयो।

त्यसैगरी वडा नम्बर २२ को मटीरीयामा उहाँले मतदाता, स्थानीय, विद्यार्थी तथा बुद्धिजीवीहरूसँग छलफल गर्दै शिक्षा, स्वास्थ्य र पूर्वाधारसँग सम्बन्धित समस्याहरूको जानकारी लिनुभयो। स्थानीयहरूले दैनिक जीवनसँग जोडिएका समस्या उम्मेदवारसमक्ष राखेका थिए।

अभियानकै क्रममा वडा नम्बर २६ को सिस्वा र बकुलहरमा पुग्नुभएका साहले शिक्षा, स्वास्थ्य, भौतिक पूर्वाधार, सुशासन र जनताको जीवनस्तर उकास्ने कामलाई प्राथमिकता दिने प्रतिबद्धता जनाउनुभयो। उहाँले लामो समयदेखि निर्माण हुन नसकेको कलैया–मानमत–मटीअर्वा सडक खण्डको उदाहरण दिँदै विगतका सत्तारूढ दलहरूले जनताको वास्तविक समस्या समाधान गर्न नसकेको आरोप लगाउनुभयो।

एक सफल उद्यमीको परिचय दिँदै साहले आफूले विभिन्न परियोजनामार्फत हजारौँलाई रोजगारी दिएको दाबी गर्नुभयो। “म सांसदमा निर्वाचित भएँ भने कलैया र समग्र बारा जिल्लाका युवाहरूका लागि उद्यमशीलता र रोजगारीका अवसर सिर्जना गर्नेछु,” उहाँले प्रतिबद्धता व्यक्त गर्नुभयो।

वीरगंज । पर्सा निर्वाचन क्षेत्र नं. १ का नेकपा एमालेका उम्मेदवार प्रदीप यादवले संकटका बेला जनताको साथमा उभिने नेतृत्वलाई नै अबको निर्वाचनमा मतदाताले रोज्नुपर्ने समय आएको बताएका छन्।

चुनावी प्रचार–प्रसार, घरदैलो अभियान तथा कार्यकर्ता भेटघाट एवं छलफल कार्यक्रमलाई सम्बोधन गर्दै यादवले वीरगंजमा चरम सुख्खा परेका बेला नगरवासीहरू खानेपानीको अभावमा भौतारिइरहेका अवस्थामा आफूले ठूलो जोखिम मोलेर केन्द्र सरकारसँग बजेटको व्यवस्था गरी धारा, बोरिङ, ट्युबवेल तथा रिजर्भ ट्याङ्कीमार्फत सहज खानेपानी वितरण गराएको स्मरण गराए।
“संकटको घडीमा कसले काम गर्छ र कसले भाषण मात्रै गर्छ भन्ने कुरा जनताले प्रत्यक्ष देखिसक्नुभएको छ,” यादवले भने।

पूर्व मन्त्रीसमेत रहेका यादवले खानेपानी मन्त्रालयको जिम्मेवारी सम्हाल्दा मन्त्रालय कस्तो हुनुपर्छ भन्ने कुरा काम गरेर प्रमाणित गरेको दाबी गरे। उनले विकास निर्माणका बाँकी कार्यहरू पूरा गर्नका लागि फेरि एकपटक अवसर दिन मतदातासँग आग्रह गर्दै जनताको समस्या समाधान गर्ने क्षमता र इच्छाशक्ति दुवै एमालेसँग रहेको बताए।

यादवले सुख्खाग्रस्त अवस्थाबाट सिर्जित समस्याहरू समाधान गर्न कुनै कसर बाँकी नराखी अघि बढेको र कोरोना महामारीका बेला वीरगंज तथा आसपासका क्षेत्रका नागरिकको स्वास्थ्य सुरक्षाका लागि महत्वपूर्ण भूमिका खेलेकोसमेत स्मरण गराए।

शिक्षा, स्वास्थ्य, खानेपानी तथा सामाजिक क्षेत्रका सुधारका कामहरूले नै आफ्नो राजनीतिक प्रतिबद्धता पुष्टि गर्ने उनको भनाइ थियो। कार्यक्रममा सहभागी स्थानीय मतदाताहरूले पनि संकटका बेला साथ दिने, काम गरेर देखाउने र राष्ट्रिय हितलाई केन्द्रमा राख्ने नेतृत्व आवश्यक रहेको बताउँदै एमालेजस्तो राष्ट्रवादी शक्तिलाई मतदान गर्न आफूहरू उत्साहित रहेको प्रतिक्रिया दिएका छन्।

कलैया । राष्ट्रिय स्वतन्त्र पार्टी (रास्वपा) का तर्फबाट बारा निर्वाचन क्षेत्र नम्बर ३ मा प्रतिनिधिसभा सदस्य पदका उम्मेदवार ई. अरविन्द साहले विश्वप्रसिद्ध गढीमाई मन्दिरमा दर्शन गर्दै आफ्नो चुनावी अभियानको औपचारिक सुरुआत गरेका छन् ।

सफल उद्यमी तथा व्यवसायीका रूपमा परिचित साह ‘खल्ती’ डिजिटल वालेट एपका सञ्चालकसमेत हुन्, जसबाट हजारौँ युवाले प्रत्यक्ष रोजगारी पाएका छन् । यस निर्वाचनमा उनले रोजगारी सृजना, स्वास्थ्य सेवा सुधार, शिक्षा सुधार र समग्र समृद्धिलाई आफ्नो प्रमुख चुनावी एजेन्डा बनाएका छन् ।

अभियानको सुरुआतका क्रममा साहसँगै रास्वपाका वरिष्ठ नेता बालेन्द्र शाह (बालेन) का दाजु कौशलेन्द्र शाहको समेत सहभागिता रहेको थियो । मन्दिर दर्शनपछि स्थानीय बासिन्दासँग अन्तर्क्रिया गर्दै कौशलेन्द्र शाहले विकास, परिवर्तन र समृद्धिका लागि रास्वपालाई जिताउन आग्रह गर्दै इतिहासमै पहिलो पटक मधेसी समुदायका व्यक्तिलाई प्रधानमन्त्री पदसम्म पुर्‍याउने अवसर दिनुपर्ने बताए ।

उनले काठमाडौँ महानगरपालिकामा बालेन्द्र शाहले तीन वर्षको कार्यकालमा विभिन्न अवरोधका बाबजुद उल्लेखनीय परिवर्तन ल्याएको उदाहरण प्रस्तुत गर्दै भने, “प्रधानमन्त्री बनेपछि देशले नै काँचुली फेर्नेछ।”

उम्मेदवार अरविन्द साहले बाराको समृद्धिका लागि आफू उम्मेदवार बनेको स्पष्ट पार्दै भने, “कुनै समय बारा जिल्लाको नाम इतिहासमा सुवर्ण अक्षरमा लेखिएको थियो, तर अहिले त्यो पहिचान क्रमशः ओझेलमा पर्दै गएको छ।”

विश्वप्रसिद्ध महागढीमाई मन्दिर क्षेत्रको विकासका लागि अहिलेसम्म ठोस योजना नआएकोप्रति दुःख व्यक्त गर्दै उनले मन्दिरको प्रचार–प्रसार, प्रवर्द्धन र संरक्षण गर्दै यस क्षेत्रलाई पर्यटकीय हबका रूपमा विकास गर्न सकिने बताए । यसले जिल्लाको आर्थिक उन्नतिमा महत्वपूर्ण योगदान पुग्ने उनको धारणा थियो ।

यसैबीच, सोही दिन उम्मेदवार साहले बारा जिल्लाको कलैया उपमहानगरपालिका–२६ मा स्थानीय बाबा कवरथुवा बाबाबाट आशीर्वाद ग्रहण गर्दै आफ्नो चुनावी गतिविधिलाई थप निरन्तरता दिएका छन् ।