वीरगंज । पर्साको कालिकामाई गाउँपालिका कार्यालयमा सि.अ.हे.व. अधिकृत (छैठो) तहमा कार्यरत तथा गाउँपालिकाका स्वास्थ्य संयोजक योगेन्द्र प्रसाद चौरसियाले पदबाट राजिनामा दिएका छन्।
चौरसियाले सोमबार गाउँपालिकाका प्रमुख प्रशासकीय अधिकृत राज कुशवाहालाई लिखित रूपमा राजिनामा बुझाएका हुन्। उनले स्वास्थ्य सेवा समूह हे.ई. तह अन्तर्गत सि.अ.हे.व. अधिकृत पदमा वि.सं. २०५३/०५/२५ गते स्थायी नियुक्ति पाएदेखि हालसम्म निरन्तर तथा अविछिन्न रूपमा सेवा गर्दै आएको उल्लेख गरेका छन्।
राजिनामापत्रमा चौरसियाले घरायसी समस्याका कारण सेवामा निरन्तरता दिन नसक्ने अवस्था आएको जनाउँदै आफ्नो इच्छाअनुसार खुसीराजीका साथ राजिनामा दिएको स्पष्ट पारेका छन्। राजिनामा दिँदा आफू मानसिक तथा शारीरिक रूपमा पूर्ण रूपमा सक्षम रहेको र कुनै किसिमको डर, त्रास वा दबाबबिना स्वतन्त्र निर्णय गरेर राजिनामा दिएको पनि उनले उल्लेख गरेका छन्। भविष्यमा यस विषयलाई लिएर कुनै उजुरी वा गुनासो नगर्ने प्रतिबद्धतासमेत उनले व्यक्त गरेका छन्।
चौरसियाले राजिनामा दिएको प्रमुख प्रशासकीय अधिकृत राज कुशवाहाले पनि पुष्टि गर्दै हाल राजिनामा स्वीकृतिको प्रक्रियामा रहेको जानकारी दिएका छन्।
यसैबीच, राजिनामा दिएका चौरसिया अब सक्रिय राजनीतिमा प्रवेश गर्ने तयारीमा रहेको बुझिएको छ। आगामी स्थानीय तहको निर्वाचनमा कालिकामाई गाउँपालिका अध्यक्ष पदमा उम्मेदवारी दिने तयारीका लागि उनले पदबाट राजिनामा दिएको बताइएको छ।
