वीरगंज । नेपाली कम्युनिष्ट पार्टी (नेकपा) पर्सा क्षेत्र नं. ४ को क्षेत्रीय भेला जिराभवानी गाउँपालिका–४ भवानीपुरमा सोमबार सम्पन्न भएको छ । नारा मात्र होइन, नीति र व्यवहारबाटै परिवर्तन गर्ने प्रतिबद्धतासहित आयोजित भेलामा वक्ताहरूले मुलुकको वर्तमान समस्याको समाधानका लागि नेकपाको विकल्प नरहेको दाबी गरेका छन्।
नेकपाका केन्द्रीय सदस्य नगेन्द्र चौधरीको प्रमुख आतिथ्यतामा सम्पन्न भेलामा बोल्ने नेताहरूले अन्य दलको तुलनामा नेपाली कम्युनिष्ट पार्टीप्रति जनताको भरोसा अझ सुदृढ हुँदै गएको बताएका थिए।
कार्यक्रममा बोल्दै नेकपा पर्सा क्षेत्र नं. ४ का प्रतिनिधिसभा सदस्यका उम्मेदवार जयप्रकाश थारुले जेन–जी पुस्ताको माग र चाहना नेकपाले मात्र पूरा गर्न सक्ने बताए । उनले जेन–जीको भावना नारामा सीमित नभई पार्टीको नीति र व्यवहारमै प्रतिबिम्बित हुनुपर्ने धारणा राख्दै सबै नेता तथा कार्यकर्ता इमान्दारीपूर्वक चुनावी प्रचार–प्रसारमा जुटे विजय सुनिश् हुने दाबी गरे।
नेता बलिराम साहले सबैले इमान्दारिताका साथ सहयोग गरे यसपटकको निर्वाचनमा पार्टीको जित सुनिश्चित हुने दृढ विश्वास व्यक्त गरे। मुलुक अहिले विषम परिस्थितिमा रहेकाले नेकपाको विकल्प नरहेको उनको भनाइ थियो ।
त्यसैगरी, पार्टीकी केन्द्रीय सदस्य सावित्री पोख्रेलले आफूलाई नयाँ र देशभक्त पार्टीका रूपमा प्रस्तुत गर्ने दलहरू मात्र नभई जनताको पक्षमा निरन्तर संघर्ष गर्दै आएको नेपाली कम्युनिष्ट पार्टीप्रति ढुक्क भएर मतदान गर्न आग्रह गरिन् ।
भेलामा नेकपाका केन्द्रीय सदस्य रामचन्द्र साह, रामबाबु बैठासहित पार्टीका नेता तथा कार्यकर्ताहरूको उल्लेख्य सहभागिता रहेको थियो।
