वीरगंज । आगामी फागुन २१ गते हुने प्रतिनिधि सभा सदस्य निर्वाचनमा पर्सा क्षेत्र नम्बर १ मा प्रमुख राजनीतिक दलहरूबीच कडा प्रतिस्पर्धा देखिएको छ। यस क्षेत्रमा नेकपा एमाले, नेपाली कांग्रेस, नेपाली कम्युनिष्ट पार्टी (नेकपा), राष्ट्रिय स्वतन्त्र पार्टी (रास्वपा), जनता समाजवादी पार्टी (जसपा) नेपाल, उज्यालो नेपाल पार्टी, जनमत पार्टी र राष्ट्रिय प्रजातन्त्र पार्टी (राप्रपा)का उम्मेदवारहरू मुख्य प्रतिस्पर्धीका रूपमा मैदानमा उत्रिएका छन्।
नेकपा एमालेले यस क्षेत्रबाट पूर्व मन्त्री एवं निर्वतमान प्रतिनिधि सभा सदस्य प्रदिप यादवलाई पुनः उम्मेदवार बनाएको छ। उनी मनोनयन दर्ताको एक दिनअघि मात्र जनता समाजवादी पार्टी परित्याग गरी एमाले प्रवेश गरेपछि उम्मेदवार बनेका हुन्। अघिल्लो निर्वाचनमा पनि उनी एमाले–जसपा गठबन्धनको तर्फबाट विजयी भएका थिए।
नेपाली कांग्रेसले संविधान सभा सदस्य एवं उद्योगपति अनिल रुंगटालाई उम्मेदवार बनाएको छ । रुंगटा यसअघि २०७४ सालको प्रतिनिधि सभा निर्वाचनमा पनि कांग्रेसकै तर्फबाट उम्मेदवार बनेका थिए । उक्त निर्वाचनमा उनी हालका एमालेका उम्मेदवार प्रदिप यादवसँग पराजित भएका थिए ।
यसैगरी, प्रचण्ड र माधव नेपाल नेतृत्वको नेकपाले सिए अजय चौरसियालाई उम्मेदवार बनाएको छ भने राष्ट्रिय स्वतन्त्र पार्टीले जिल्ला सभापति एवं होटल व्यवसायी हरि पन्तलाई उम्मेदवार बनाएको छ । जनता समाजवादी पार्टी नेपालले जिल्ला अध्यक्ष रामनरेश यादवलाई उम्मेदवार बनाएको छ।
कुलमान घिसिङ नेतृत्वको उज्यालो नेपाल पार्टीले वीरगंज महानगरपालिका वडा नम्बर २० का निर्वतमान वडाध्यक्ष रामकिशोर सिंह (पराग)लाई उम्मेदवार बनाएको छ भने जनमत पार्टीले जिल्ला अध्यक्ष ओमप्रकाश सर्राफ र राष्ट्रिय प्रजातन्त्र पार्टीले नन्दु श्रीवास्तवलाई उम्मेदवार बनाएको छ ।
यसका अतिरिक्त प्रभु साह नेतृत्वको आम जनता पार्टीबाट विश्वराज पटेल, हर्क सम्पाङ नेतृत्वको श्रम सांस्कृतिक पार्टीबाट वषिम शेष तथा पिपुल फस्ट पार्टीबाट जावेद एकवाल हैदर उम्मेदवार बनेका छन्।
अघिल्लो निर्वाचनमा एमाले–जसपा गठबन्धनका तर्फबाट प्रदिप यादव विजयी भएका थिए भने उनका निकटतम प्रतिस्पर्धी स्वतन्त्र उम्मेदवारका रूपमा मैदानमा उत्रिएका नेपाली कांग्रेसका अजय द्विवेदी रहेका थिए । यसपटक भने प्रमुख दलहरू अलग–अलग रूपमा प्रतिस्पर्धामा उत्रिँदा पर्सा क्षेत्र नम्बर १ को चुनावी माहोल थप रोचक र प्रतिस्पर्धात्मक बन्दै गएको छ।
