वीरगंज । उज्यालो नेपाल पार्टीका तर्फबाट पर्सा निर्वाचन क्षेत्र नम्बर–१ का प्रतिनिधिसभा सदस्य उम्मेदवार रामकिशोर सिंह (पराग)ले आज आफ्नै गाउँ वीरगञ्ज महानगरपालिका वडा नम्बर–२० अन्तर्गत अपौनी र हरपतगन्जमा घरदैलो कार्यक्रम सम्पन्न गरेका छन् ।
घरदैलोका क्रममा स्थानीयवासीहरूले फूलमाला तथा गम्छा लगाई उम्मेदवार सिंहलाई भव्य स्वागत गरेका थिए । कार्यक्रममा गाउँवासीको उल्लेखनीय सहभागिता देखिएको थियो ।
भेटघाटका क्रममा स्थानीय तथा युवाहरूले देशलाई शिक्षित, सक्षम र इमान्दार युवा नेतृत्व आवश्यक रहेको धारणा व्यक्त गर्दै “गाउँ मात्र होइन, समग्र नेपालका लागि सोच्ने र काम गर्ने युवा सांसद चाहिएको छ” बताएका थिए ।
स्थानीयवासीहरूले वडा अध्यक्षका रूपमा निर्वाचित भई विकास निर्माणका कामसँगै महानगरभित्र देखिएका विकृति तथा भ्रष्टाचारका विषयमा आवाज उठाएको भन्दै सिंहको प्रशंसा गरेका थिए । उनीहरूले आगामी निर्वाचनमा पूर्ण सहयोग र समर्थन रहने प्रतिबद्धता जनाए ।
कार्यक्रमपछि उम्मेदवार सिंहले गाउँवासीहरूको माया, स्नेह र विश्वासप्रति कृतज्ञता व्यक्त गर्दै आगामी दिनहरूमा पनि जनताकै बीचमा रहेर गुनासा सुन्ने र विकासका कार्यमा निरन्तर अग्रसर रहने बताए ।
“म पुराना पार्टी र उम्मेदवार जस्तो हुने छैन । जित–हार आफ्नो ठाउँमा हुन्छ, तर म नेता भएर होइन, सम्पूर्ण जनताको सेवक बनेर काम गर्नेछु,” सिंहले भने ।
उनले शिक्षा, स्वास्थ्य, रोजगारी तथा भौतिक पूर्वाधार विकासलाई प्राथमिकतामा राख्दै क्षेत्रको समग्र विकासका लागि योजनाबद्ध रूपमा अघि बढ्ने प्रतिबद्धता व्यक्त गरेका छन् ।
