वीरगंज । जिल्ला प्रशासन कार्यालय, पर्साले प्रतिनिधि सभा सदस्य निर्वाचनलाई स्वच्छ, निष्पक्ष र भयमुक्त वातावरणमा सम्पन्न गर्न मदिराजन्य पदार्थको बिक्री–वितरण तथा सेवनमा प्रतिबन्ध लगाएको सूचना जारी गरेको छ ।
कार्यालयद्वारा प्रकाशित सूचनाअनुसार यही फागुन २१ गते हुन गइरहेको प्रतिनिधि सभा सदस्य निर्वाचनलाई लक्षित गर्दै सार्वजनिक स्थानमा मदिराजन्य पदार्थको बिक्री–वितरण र सेवनबाट शान्ति–सुरक्षामा पर्न सक्ने असरलाई मध्यनजर गरिएको हो ।
निर्वाचन आयोग, नेपालद्वारा प्रकाशित विज्ञप्ति, गृह मन्त्रालयबाट प्राप्त निर्देशन तथा जिल्ला सुरक्षा समितिको मिति २०८२।११।१४ गतेको निर्णयअनुसार मिति २०८२।११।१५ गतेदेखि लागू हुने गरी निर्वाचनको अन्तिम परिणाम घोषणा नभएसम्म जिल्लाभर मदिरा बिक्री–वितरण तथा सेवनमा रोक लगाइएको जनाइएको छ।
सहायक प्रमुख जिल्ला अधिकारी विनोद कुमार पोखरेलले जारी गरेको सूचनामार्फत कोही कसैले उक्त निर्णयको उल्लङ्घन गरी मदिरा बिक्री–वितरण वा सेवन गरेको पाइएमा प्रचलित कानूनबमोजिम कारबाही गरिने चेतावनी दिइएको छ। सूचनामा सम्बन्धित सबैलाई निर्णयको पालना गर्न आग्रह समेत गरिएको छ।
