वीरगंजमा । निर्वाचन रिपोर्टिङलाई मर्यादित, निष्पक्ष र जिम्मेवार बनाउन केन्द्रित एक दिने अभिमुखीकरण कार्यक्रम बुधबार वीरगञ्जमा सम्पन्न भएको छ ।
नेपाल पत्रकार महासंघ केन्द्रीय कार्यालयको आयोजनामा भएको कार्यक्रममा मधेस प्रदेशका आठवटै जिल्लाका जिल्ला शाखाका अध्यक्ष, पदाधिकारी तथा फिल्डमा सक्रिय पत्रकारहरूको सहभागिता रहेको थियो । कार्यक्रमको सहजीकरण महासंघको मधेस प्रदेश समितिले गरेको थियो ।
महासंघकी केन्द्रीय महिला उपाध्यक्ष नितु पंडितको अध्यक्षतामा सम्पन्न कार्यक्रममा पर्साका प्रमुख जिल्ला अधिकारी भोला दाहाल, महासंघका केन्द्रीय सचिव अशोक तिवारी, पूर्व सचिव दिपेन्द्र चौहान, लेखा समिति संयोजक केशी लामिक्षाने, मधेस प्रदेश अध्यक्ष श्याम बन्जारा, पर्सा अध्यक्ष ओमप्रकाश खनाल, बारा अध्यक्ष रमेश सुवेदीलगायतको उपस्थिति रहेको थियो ।
अभिमुखीकरणका क्रममा सहभागी पत्रकारहरूलाई चार समूहमा विभाजन गरी निर्वाचन आचारसंहिता पालनासम्बन्धी विषयमा विस्तृत छलफल गराइएको थियो । विशेषगरी निर्वाचन अवधिमा प्रकाशित हुने समाचारले आमजनतामा पार्ने प्रभाव, मतदाताको धारणा निर्माणमा सञ्चारमाध्यमको भूमिका तथा तथ्यपरक र सन्तुलित रिपोर्टिङको आवश्यकता बारे केन्द्रित बहस भएको आयोजकले जनाएको छ ।
कार्यक्रममा वक्ताहरूले निर्वाचन रिपोर्टिङका क्रममा सत्यता, सन्तुलन र जिम्मेवारी कायम राख्नु पत्रकारको मुख्य दायित्व भएकोमा जोड दिएका थिए ।
