वीरगंज । पर्साको पटेर्वा सुगौली गाउँपालिकाले नवनिर्मित आफ्नै प्रशासनिक भवनबाट सोमबारदेखि औपचारिक रूपमा सेवा सञ्चालन सुरु गरेको छ। विगत साढे ३ वर्षदेखि वडा नं. ४ दापासुगौलीस्थित गुदरीबाबा मन्दिरको सामुदायिक भवनबाट सञ्चालन हुँदै आएको गाउँपालिका कार्यालय अब आफ्नै आधुनिक सुविधा सम्पन्न भवनमा सारिएको हो।

सोमबार हिन्दु धार्मिक विधिअनुसार गाउँपालिका अध्यक्ष दिनेश चौधरीले भवनको पूजा–पाठ गरेपछि सबै दैनिक प्रशासनिक कामकाज नयाँ भवनबाटै सुरु गरिएको उपाध्यक्ष ममता महत्तो चौधरीले जानकारी दिइन्।

वडा नं. ४ दापासुगौलीमै ६ करोड ९ लाख खर्चमा निर्माण गरिएको तीन तल्ले भवनमा २० कोठा, दुई सभाकक्ष, एक न्यायिक इजलास, शौचालय तथा अन्य आवश्यक संरचना समेटिएको प्रमुख प्रशासकीय अधिकृत प्राण मेहताले बताए। २०८० फागुनमा शिलान्यास गरिएको भवन निर्माणमा संघ सरकारको शहरी विकास मन्त्रालयको ६० प्रतिशत (करिब ३ करोड ६० लाख) तथा गाउँपालिकाको ४० प्रतिशत लागत रहेको उनले जानकारी दिए।

उपाध्यक्ष चौधरीका अनुसार, सामुदायिक भवनबाट सेवा प्रवाह गर्दा आवत–जावत, कागजी प्रक्रिया तथा प्रशासनिक काममा धेरै समस्या हुने गरेको थियो। अब भने आफ्नै भवनमा सरेपछि सेवाग्राहीलाई सहज, छरितो र व्यवस्थित सेवा उपलब्ध हुने बताइन्।

भवनको पूजा–पाठ गरी सेवा सुरु गरिए पनि यसको औपचारिक उद्घाटन भने बाँकी रहेको गाउँपालिका अध्यक्ष चौधरीले बताए। सम्भवत यही मंसिर महिनाभित्रै भव्य समारोह गरी भवनको औपचारिक उद्‌घाटन गर्ने तयारी भइरहेको उनले उल्लेख गरे।

सोमबार आयोजित पूजा–पाठ कार्यक्रममा गाउँपालिका अध्यक्ष दिनेश चौधरी, उपाध्यक्ष ममता महत्तो, प्रमुख प्रशासकीय अधिकृत प्राण मेहता, वडा नं. २ का वडा अध्यक्ष विजय गैरे, विभिन्न शाखा प्रमुख तथा कर्मचारीहरूको उपस्थिति थियो।