वीरगंज । पर्सा जिल्लाको निर्वाचन क्षेत्र नम्बर–३ अन्तर्गत बिन्दवासिनी गाउँपालिकामा नेपाल कम्युनिस्ट पार्टी (एकीकृत मार्क्सवादी–लेनिनवादी) को घरदैलो तथा जनता भेटघाट कार्यक्रम उत्साहपूर्ण रूपमा सम्पन्न भएको छ। प्रतिनिधिसभा सदस्यका युवा उम्मेदवार रूपेश कुमार पाण्डेको पक्षमा उल्लेखनीय जनसहभागिता देखिएको छ।
बिन्दवासिनीका प्रसौनी, अमरपट्टी, मधवललगायतका टोलहरूमा पुगेका उम्मेदवार पाण्डेलाई स्थानीयवासीले आत्मीय स्वागत गरेका थिए। घरदैलो कार्यक्रमका क्रममा उनले मतदातासँग प्रत्यक्ष संवाद गर्दै पर्सा–३ लाई आर्थिक, सामाजिक तथा पूर्वाधार विकासको दृष्टिले अगाडि बढाउने स्पष्ट योजना प्रस्तुत गरेका छन्।
स्थानीय युवाहरू, महिला समूह तथा ज्येष्ठ नागरिकहरूले सक्षम, पहुँचयोग्य र जवाफदेही नेतृत्वको आवश्यकता औंल्याउँदै यसपटक क्षेत्रलाई नयाँ ऊर्जा र स्पष्ट दिशानिर्देशन दिन सक्ने नेतृत्व आवश्यक रहेको बताएका छन्। विशेषगरी रोजगारी सिर्जना, कृषि आधुनिकीकरण, गुणस्तरीय शिक्षा, सहज स्वास्थ्य सेवा तथा स्थानीय उद्योग–व्यवसाय प्रवर्द्धनका एजेन्डाले मतदातालाई आकर्षित गरेको देखिएको छ।
पर्सा–३ मा यसपटक पुस्तान्तरणको बहस पनि प्रमुख विषय बनेको छ। लामो समयदेखि परम्परागत नेतृत्वको प्रभाव रहेको क्षेत्रमा युवा उम्मेदवारको सक्रियता र निरन्तर जनसम्पर्कले चुनावी माहोललाई नयाँ मोड दिएको छ। रूपेश पाण्डे विगत केही वर्षदेखि क्षेत्रीय सामाजिक तथा राजनीतिक गतिविधिमा सक्रिय रहँदै आफूलाई परिवर्तनको वाहकका रूपमा स्थापित गर्न प्रयासरत छन्।
घरदैलो कार्यक्रमका क्रममा स्थानीय बासिन्दाहरूले विकासप्रति प्रतिबद्ध, पहुँचयोग्य र जवाफदेही नेतृत्वको आवश्यकता औंल्याउँदै पाण्डेलाई भारी मतले विजयी गराउने प्रतिबद्धता जनाएका थिए।
समग्रमा बिन्दवासिनी क्षेत्रमा देखिएको जनसक्रियता र समर्थनलाई आधार मान्दा पर्सा–३ को चुनावी प्रतिस्पर्धा थप रोचक बन्दै गएको छ। आगामी निर्वाचन परिणामले यस क्षेत्रको राजनीतिक दिशानिर्देशनमा नयाँ मोड ल्याउने अपेक्षा गरिएको छ।
