वीरगंज । पर्साका चारवटै निर्वाचन क्षेत्रमा सम्पन्न प्रतिनिधिसभा निर्वाचन २०८२ को मतगणना प्रक्रिया जारी रहेको छ। प्रारम्भिक मतगणनाको परिणामअनुसार पर्सा जिल्लाका चारै क्षेत्रमा राष्ट्रिय स्वतन्त्र पार्टी (रास्वपा) का उम्मेदवारहरूले अग्रता कायम गरेका छन्।

शुक्रबार बिहानदेखि सुरु भएको मतगणनाको प्रारम्भिक परिणामअनुसार पर्सा क्षेत्र नम्बर १, २, ३ र ४ मा रास्वपाले स्पष्ट अग्रता लिएको हो। पर्सा क्षेत्र नं. १ र २ काे वीरगंजस्थित ठाकुर राम बहुमुखी क्याम्पसमा र क्षेत्र नं. ३ र ४ काे मतगणना पाेखरियास्थित श्री जिल्ला उच्चांगल रामदेव कलवार माविमा भइरहेकाे छ ।

पर्सा क्षेत्र नं. १ मा रास्वपाका बुद्धिप्रसाद पन्त (हरि पन्त) ४ हजार ७१४ मतसहित पहिलो स्थानमा रहेका छन्। उनका निकटतम प्रतिस्पर्धी नेकपा एमालेका पूर्व मन्त्री प्रदीप यादवले २ हजार ५४४ मत प्राप्त गरेका छन् भने नेपाली कांग्रेसका अनिल रुङ्टा २ हजार १९७ मतसहित तेस्रो स्थानमा रहेका छन्।

त्यसैगरी पर्सा क्षेत्र नं. २ मा रास्वपाका सुशील कुमार कानु ९ हजार ४३३ मतसहित अग्रस्थानमा रहेका छन्। नेपाली कांग्रेसका अजय कुमार चौरसिया ३ हजार ८७६ मतसहित दोस्रो स्थानमा छन् भने नेकपा एमालेकी रीमा कुमार यादव ३ हजार ५९२ मतसहित तेस्रो स्थानमा रहेकी छन्।

पर्सा क्षेत्र नं. ३ मा रास्वपाका रामाकान्त चौरसिया ४ हजार १११ मतसहित पहिलो स्थानमा रहेका छन्। नेपाली कांग्रेसका सुरेन्द्र प्रसाद चौधरी २ हजार १३२ मतसहित दोस्रो स्थानमा छन् भने नेकपा एमालेका रुपेश कुमार पाण्डेय १ हजार ९१३ मतसहित तेस्रो स्थानमा रहेका छन्।

त्यसैगरी पर्सा क्षेत्र नम्बर ४ मा रास्वपाका टेक बहादुर शाक्य २ हजार ६७७ मत प्राप्त गर्दै अग्रस्थानमा छन्। नेपाली कांग्रेसका रमेश रिजाल ८८१ मतसहित दोस्रो स्थानमा छन् भने नेकपा एमालेका जालिम मियाँ ४४२ मतसहित तेस्रो स्थानमा रहेका छन्।

प्रारम्भिक मतपरिणामले चारै क्षेत्रमा रास्वपाको बलियो उपस्थिति देखाएको छ । देशभर देखिएको नयाँ राजनीतिक आकर्षण जस्तै पर्सामा पनि रास्वपा उम्मेदवारप्रति मतदाताको झुकाव देखिएको छ। प्रारम्भिक नतिजाका आधारमा पर्साका चारै क्षेत्र राष्ट्रिय स्वतन्त्र पार्टीले जित्न सक्ने अनुमान समेत गरिएको छ।

वीरगंज । प्रतिनिधिसभा निर्वाचन २०८२ अन्तर्गत मतगणना प्रक्रिया जारी रहँदा पर्सा जिल्लाका चार वटै निर्वाचन क्षेत्रमा राष्ट्रिय स्वतन्त्र पार्टी (रास्वपा) का उम्मेदवारहरूले अग्रता लिएका छन्।

शुक्रबार बिहानदेखि सुरु भएको प्रारम्भिक मतगणनाको परिणामअनुसार पर्साको निर्वाचन क्षेत्र नम्बर १, २, ३ र ४ मा रास्वपाले स्पष्ट अग्रता कायम गरेको हो।

पर्सा क्षेत्र नं. १ मा रास्वपाका हरि पन्त (बुद्धिप्रसाद पन्त) ७९३ मत प्राप्त गर्दै पहिलो स्थानमा रहेका छन्। उनका निकटतम प्रतिस्पर्धी नेपाली कांग्रेसका अनिल रुङ्टाले ४८० मत प्राप्त गरेका छन् भने नेकपा (एमाले) का प्रदीप यादव ४०५ मतसहित तेस्रो स्थानमा रहेका छन्। प्रारम्भिक नतिजाले उक्त क्षेत्रमा रास्वपाको बलियो उपस्थिति देखाएको छ।

त्यसैगरी पर्सा क्षेत्र नं. २ मा रास्वपाका सुशील कुमार कानुले १५३८ मतसहित अग्रता कायम गरेका छन्। नेकपा (एमाले) की रीमा कुमार यादवले १०५६ मत प्राप्त गर्दै दोस्रो स्थानमा छिन् भने नेपाली काँग्रेसका अजय कुमार चौरसिया ६८३ मतसहित तेस्रो स्थानमा रहेका छन्।

पर्सा क्षेत्र नं. ३ मा रास्वपाका रामाकान्त चौरसियाले १०५१ मत प्राप्त गर्दै पहिलो स्थानमा रहेका छन्। नेपाली काँग्रेसका सुरेन्द्र चौधरी ७७१ मतसहित दोस्रो स्थानमा छन् भने नेकपा (एमाले) का रुपेश पाण्डेय २३८ मतसहित तेस्रो स्थानमा रहेका छन्।

यसैगरी पर्सा क्षेत्र नम्बर ४ मा रास्वपाका टेक बहादुर शाक्यले ५६६ मत प्राप्त गर्दै अग्रस्थानमा रहेका छन्। नेकपा (एमाले) का जालिम मियाँ २३३ मतसहित दोस्रो स्थानमा छन् भने नेपाली कांग्रेसका रमेश रिजाल १६९ मतसहित तेस्रो स्थानमा रहेका छन्।

प्रारम्भिक मतगणनाले पर्साका चारै क्षेत्रमा रास्वपाको बलियो उपस्थिति देखाएको भए पनि अन्तिम परिणामका लागि थप मतगणना बाँकी रहेको छ।

वीरगंज । प्रतिनिधि सभा सदस्य निर्वाचनअन्तर्गत आज बिहान ७ बजेदेखि पर्सा जिल्लाभर शान्तिपूर्ण रूपमा मतदान सुरु भएको छ। जिल्ला निर्वाचन कार्यालयका अनुसार सबै मतदान केन्द्रमा सुरक्षाको उचित प्रबन्ध मिलाइएपछि निर्धारित समयमै मतदान प्रक्रिया प्रारम्भ गरिएको हो।

पर्साको कालिकामाई गाउँपालिका वडा नं. २ भेडिहारीस्थित श्री सुकई साह मतदान केन्द्रमा बिहानैदेखि मतदाताको उत्साहजनक उपस्थिति देखिएको छ। महिला, ज्येष्ठ नागरिक तथा युवाहरू लामबद्ध रूपमा आफ्नो मताधिकार प्रयोग गर्न केन्द्रमा पुगेका छन्। अन्य स्थानीय तहका मतदान केन्द्रहरूमा पनि शान्तिपूर्ण वातावरणमा मतदान भइरहेको छ।

जेन–जी आन्दोलनपछि राजनीतिक परिवेशमा आएको परिवर्तनका कारण मूलतः २०८४ मा हुने प्रतिनिधि सभा सदस्य निर्वाचन २०८२ मै सम्पन्न भइरहेको हो। यस निर्वाचनलाई राजनीतिक रूपमा चासोका साथ हेरिएको छ भने नयाँ पुस्ताको सक्रिय सहभागिताले चुनावी माहोल थप रोचक बनेको छ।

जिल्ला सुरक्षा समितिले मतदान अवधिभर कुनै अवाञ्छित गतिविधि हुन नदिन सुरक्षा निकायलाई उच्च सतर्कतामा राखेको जनाएको छ। मतदातालाई निर्भीक र स्वतन्त्र रूपमा मतदान गर्न अनुरोध गरिएको छ।

निर्वाचन आयोगका प्रतिनिधिका अनुसार बेलुकी ५ बजेसम्म मतदान जारी रहनेछ। कुनै अवरोध नआए निर्धारित समयमै मतदान सम्पन्न गरी मतपेटिका संकलन प्रक्रिया अगाडि बढाइने बताइएको छ।