काठमाडौं । झापा निर्वाचन क्षेत्र नम्बर ५ बाट राष्ट्रिय स्वतन्त्र पार्टी (रास्वपा) का वरिष्ठ नेता बालेन शाह प्रतिनिधि सभा सदस्यमा निर्वाचित भएका छन् ।

अन्तिम मतपरिणाम अनुसार शाहले ६८ हजार ३४८ मत प्राप्त गर्दै विजय हासिल गरेका हुन् । उनले नेकपा (एमाले) का अध्यक्ष तथा पूर्वप्रधानमन्त्री केपी शर्मा ओलीलाई ४९ हजार ६१४ मतान्तरले पराजित गरेका छन् । ओलीले १८ हजार ७२४ मत प्राप्त गरेका छन् ।

यसैगरी, यस क्षेत्रमा श्रम संस्कृति पार्टीका समिर तामाङले ९ हजार २३३ मत प्राप्त गरेका छन् भने नेपाली कांग्रेसकी उम्मेदवार मंधरा चिमरियाले १ हजार ८२१ मत ल्याएकी छन् । त्यस्तै राष्ट्रिय प्रजातन्त्र पार्टीका लम्मी प्रसाद संग्रौलाले १ हजार ५३६ मत र नेपाली कम्युनिष्ट पार्टीका रन्जित तामाङले १ हजार ४६१ मत प्राप्त गरेका छन् ।

यस वर्षको प्रतिनिधि सभा निर्वाचनमा झापा–५ सबैभन्दा बढी चर्चामा रहेको निर्वाचन क्षेत्रमध्ये एक थियो । काठमाडौं महानगरपालिकाका पूर्वमेयर बालेन शाहले उम्मेदवारी दिएपछि यहाँ नेकपा एमालेका अध्यक्ष केपी शर्मा ओलीसँग हुने प्रतिस्पर्धालाई लिएर देशभर चासो र चर्चा बढेको थियो ।

वीरगंज । बारा निर्वाचन क्षेत्र नम्बर–३ बाट प्रतिनिधि सभा सदस्यमा राष्ट्रिय स्वतन्त्र पार्टी (रास्वपा)का उम्मेदवार इन्जिनियर अरविन्द साह ३० हजारभन्दा बढी मतान्तरले विजयी भएका छन्।

उद्यमी तथा ग्रामीण विकास क्षेत्रमा सक्रिय समाजसेवीका रूपमा परिचित साहले आफ्नो पहिलो संसदीय निर्वाचनमै उत्कृष्ट प्रदर्शन गर्दै फराकिलो मतान्तरसहित विजय हासिल गरेका हुन्।

निर्वाचन परिणामअनुसार साहले कुल ४० हजार ६ सय ९७ मत प्राप्त गरेका छन्। उनका निकटतम प्रतिद्वन्द्वी नेपाली कांग्रेसका फरमुल्लाह मन्सुरले १० हजार ५२ मत मात्रै प्राप्त गरेका छन्। दुवैबीचको मतान्तर ३० हजार ६ सय ४५ रहेको छ।

मन्सुर पूर्वमन्त्री तथा नेपाली कांग्रेसका सह–महामन्त्री हुन्। उनी गगन थापाको नेतृत्वमा सम्पन्न कांग्रेसको दोस्रो विशेष महाधिवेशनबाट सह–महामन्त्रीमा निर्वाचित भएका थिए।

तेस्रो स्थानमा जनता समाजवादी पार्टी (जसपा) नेपालका पूर्वसांसद रामबाबु यादव रहेका छन्। उनले ६ हजार ८ सय ८४ मत प्राप्त गरेका छन्।

यसैगरी, पूर्वमन्त्री तथा यसअघि सोही क्षेत्रबाट निर्वाचित सांसद ज्वाला कुमारी साह (नेकपा एमाले) ले ५ हजार २ सय ७१ मत प्राप्त गरेकी छन्। एमाले अध्यक्ष केपी शर्मा ओली निकट मानिने साहलाई पार्टीको जिल्ला कमिटीको निर्णय विपरीत टिकट दिइएको बताइन्छ।

जनमत पार्टीका प्रमोद प्रसाद गुप्ता भने ३ हजार ८ सय १९ मतमा सीमित भएका छन्। पटक–पटक दल परिवर्तन गरेका गुप्ताले अन्तिम समयमा जनमत पार्टीबाट चुनाव लडेका थिए।

इन्जिनियर अरविन्द साह नेपालका सफल डिजिटल भुक्तानी प्लेटफर्म ‘खल्ती’ डिजिटल वालेट, स्प्यारो एसएमएसलगायतका आइटी कम्पनी सञ्चालन गर्ने जानकी टेक्नोलोजीका सह–संस्थापक हुन्। ग्रामीण विकास र प्रविधिमा आधारित उद्यमशीलताका क्षेत्रमा सक्रिय साह पहिलो प्रयासमै संसद प्रवेश गरेका हुन्।

उनको विजयले बारा–३ मा नयाँ पुस्ताको नेतृत्व र परिवर्तनको सन्देश दिएको स्थानीयले बताएका छन्।

काठमाडौं । प्रतिनिधि सभा निर्वाचन अन्तर्गत काठमाडौं क्षेत्र नं. ३ मा राष्ट्रिय स्वतन्त्र पार्टी (रास्वपा) का उम्मेदवार राजुनाथ पाण्डे विजयी भएका छन्।

निर्वाचन आयोगको आधिकारिक परिणामअनुसार, पाण्डेले कुल १८,७५७ मत प्राप्त गरेका छन्। उनका निकटतम प्रतिस्पर्धी उज्यालो नेपाल पार्टीका कुलमान घिसिङले ११,१७१ मत ल्याए।

अन्य उम्मेदवारहरूमा नेपाली कांग्रेसका रमेश अर्यालले ६,००० मत र नेकपा एमालेका रामेश्वर फुयालले ३,८१६ मत प्राप्त गरेका छन्।