वीरगंज । पर्सा निर्वाचन क्षेत्र नम्बर–१ बाट प्रतिनिधि सभा सदस्यमा राष्ट्रिय स्वतन्त्र पार्टी (रास्वपा)का उम्मेदवार बुद्धि प्रसाद पन्त (हरि पन्त) विजयी भएका छन्।
मुख्य निर्वाचन अधिकृत गायत्री प्रसाद रेग्मीका अनुसार रास्वपाका पन्तले नेकपा (एमाले)का उम्मेदवार पूर्व मन्त्री प्रदीप यादवलाई १४ हजार २ सय ४४ मतान्तरले पराजित गर्दै जीत हासिल गरेका हुन् । पन्तले कुल २७ हजार २ सय ७४ मत प्राप्त गरेका छन् भने उनका निकटतम प्रतिद्वन्द्वी यादवले १३ हजार ३० मत पाएका छन्।
त्यसैगरी नेपाली कांग्रेसका उम्मेदवार अनिल रुंग्टाले ११ हजार ८ सय ८५ मत प्राप्त गरेका छन् । अन्य उम्मेदवारमध्ये राष्ट्रिय प्रजातन्त्र पार्टीका नन्द किशोर प्रसाद श्रीवास्तव (नन्दु श्रीवास्तव) ले १ हजार २७२, जनता समाजवादी पार्टी (जसपा) नेपालका रामनरेश प्रसाद यादवले १ हजार २०१, नेपाल कम्युनिष्ट पार्टी (नेकपा) का अजय चौरसियाले ५३७ मत प्राप्त गरेका छन्।
उज्यालो नेपाल पार्टीका रामकिशोर सिंह (पराग) ले ४१५, स्वतन्त्र उम्मेदवार विशाल कुमारले ३८१, जनमत पार्टीका ओमप्रकाश सर्राफले ३४१, पिपुल फस्ट पार्टीका जाबेद एकबाल हैदरले २५२ मत प्राप्त गरेका छन्।
त्यस्तै श्रम संस्कृति पार्टीका वसिम शेषले ९०, आम जनता पार्टीका विश्वराज पटेलले ५४, नेपाल जनता पार्टीका सुरेश प्रसाद साह कानुले ४६, जन अधिकार पार्टीका महेश कुमार पासवानले ३४, नेपाल मजदुर किसान पार्टीले १५ तथा नेपाल कम्युनिष्ट पार्टी (संयुक्त) का शंकर कुमार कर्णले ११ मत प्राप्त गरेका छन्।
पर्सा क्षेत्र नम्बर–१ मा कुल ८९ हजार ६ सय ३८ मतदाता रहेकोमा ६१ हजार ३ सय ६ मत खसेको मुख्य निर्वाचन अधिकृतको कार्यालयले जनाएको छ।
मतगणनाको सुरुदेखि नै स्पष्ट अग्रता बनाएका पन्तले अन्ततः ठूलो मतान्तरसहित विजय हासिल गरेका हुन्।
