वीरगंज । पर्सा निर्वाचन क्षेत्र नं. २ मा राष्ट्रिय स्वतन्त्र पार्टी (रास्वपा) का उम्मेदवार सुशिल कुमार कानु १८ हजार भन्दा बढी मतान्तरले विजयी भएका छन्।
वडाध्यक्षबाट राजीनामा दिएर प्रतिनिधि सभा सदस्यमा उम्मेदवारी दिएका कानुले नेपाली कांग्रेसका उम्मेदवार एवं पूर्व मन्त्री अजय कुमार चौरसियालाई १८ हजार ८५० मतान्तरले पराजित गर्दै जीत हासिल गरेका हुन् । निर्वाचन कार्यालयका अनुसार कानुले ३० हजार ७४० मत प्राप्त गरे भने उनका निकटतम प्रतिस्पर्धी चौरसियाले ११ हजार ८९० मत पाएका छन्।
त्यसैगरी नेकपा एमालेकी उम्मेदवार रिमा कुमारी यादवले ११ हजार ६०५ मत प्राप्त गरिन् । जनता समाजवादी पार्टी (जसपा) नेपालका अशोक कुमार अग्रवालले २ हजार ६४२, राष्ट्रिय प्रजातन्त्र पार्टीकी बिना जैसवालले १ हजार ६९९, नेपाली कम्युनिष्ट पार्टी (नेकपा)का मनोज कुमार चौधरीले ९१३, प्रगतिशील लोकतान्त्रिक पार्टीका अमिताभ बचन दासले ३३०, जनमत पार्टीका श्याम प्रसाद गुप्ताले २२८, आम जनता पार्टीकी रंजु कुमारी साहले २०३ मत प्राप्त गरे।
त्यसैगरी नेपाल जनता पार्टीका संतोष कुमार पटेलले १७८, उज्यालो नेपाल पार्टीका कृष्ण मुरारी प्रजापतिले १४८, स्वतन्त्र उम्मेदवार लक्ष्मी नारायण गुप्ताले १००, श्रम संस्कृति पार्टीका पुन्देश्वर प्रसाद यादवले ८३ मत पाएका छन्।
