वीरगंज । पर्सा जिल्लाको प्रतिनिधिसभा निर्वाचन क्षेत्र नम्बर–३ मा मतगणना जारी रहेका बेला नेपाली कम्युनिष्ट पार्टी (नेकपा) का उम्मेदवार छोटेलाल यादवले पार्टी परित्याग गरेको घोषणा गरेका छन्।
यादवले आफ्नो आधिकारिक फेसबुकमार्फत पार्टी छाडेको घाेषण गरेपछि उनीमाथि विभिन्न किसिमकाे आराेपहरु लाग्न सुरु भएकाे छ । पार्टी परित्याग गरेकाे फेसबुक स्टाटस सार्वजनिक भएपछि उनीमाथि पार्टी परिवर्तन तथा मत प्रभावित गर्ने प्रयास गरेको आरोप लाग्न थालेको हाे ।
स्थानीय राजनीतिक वृत्तमा फैलिएको चर्चाअनुसार यादवले सामाजिक सञ्जाल फेसबुकमा स्टाटस लेख्दै पार्टी परिवर्तन गरेको संकेत दिएका हुन् । मतगणना चलिरहेकै समयमा यस्तो अभिव्यक्ति सार्वजनिक भएपछि राजनीतिक वृत्तमा विभिन्न अड्कलबाजी सुरु भएको छ ।
यादवले आफू निर्वाचित नहुने अवस्था देखेपछि आफ्नो पक्षमा आउने मत अन्य उम्मेदवारतर्फ मोड्ने प्रयास गरेको तथा केही लाभको लोभमा मत ‘बेचबिखन’ गरेको आरोपसमेत लागेको बताइएको छ । यद्यपि यी आरोपहरू औपचारिक रूपमा पुष्टि भने भएका छैनन्।
यसैबीच, स्थानीय स्तरमा फैलिएको चर्चाअनुसार यादवले हरिनारायण रौनियारसँग मिलेर पूर्वमन्त्री राजकुमारको इशारामा पर्सा क्षेत्र नम्बर–२ र ३ का एमाले उम्मेदवारलाई हराउने रणनीतिमा लागेको भन्ने चर्चा पनि चलिरहेको छ।
तर, यस विषयमा सम्बन्धित पक्षबाट औपचारिक प्रतिक्रिया भने सार्वजनिक भएको छैन । निर्वाचन अधिकारीहरूका अनुसार मतगणना प्रक्रिया भने नियमित रूपमा जारी रहेको छ।
