वीरगंज । बारा निर्वाचन क्षेत्र नम्बर–४ बाट प्रतिनिधि सभा सदस्यमा राष्ट्रिय स्वतन्त्र पार्टी (रास्वपा)का उम्मेदवार रहबर अन्सारी फराकिलो मतान्तरले विजयी भएका छन्।
पूर्वराज्यमन्त्री तथा निर्वतमान प्रदेश सभा सदस्य समेत रहेका अन्सारीले कुल ४१ हजार २०० मत प्राप्त गर्दै विजय हासिल गरेका हुन्। उनले नेकपा (एमाले)का उम्मेदवार तथा पूर्वमन्त्री कृष्णकुमार श्रेष्ठ (किशान श्रेष्ठ)लाई २९ हजार ५६१ मतान्तरले पराजित गरेका छन्।
निर्वाचन परिणामअनुसार एमालेका श्रेष्ठले ११ हजार ६३९ मत मात्रै प्राप्त गरेका छन्। उनी यस क्षेत्रकाे निर्वतमान सांसद समेत हुन् ।
यसैगरी जनता समाजवादी पार्टी (जसपा) नेपालका सन्जु साह कानुले ७ हजार ५९३, नेपाली कांग्रेसका श्यामबाबु गुप्ताले ७ हजार ११३ तथा नेपाली कम्युनिष्ट पार्टी (नेकपा)का अजय कुशवाहाले २ हजार ६७ मत प्राप्त गरेका छन्।
अन्य उम्मेदवारमध्ये राष्ट्रिय एकता दलका विनय यादवले १ हजार २३, राष्ट्रिय निर्माण दलका समिम मियाँ अन्सारीले ८८१, आम जनता पार्टीका उमेश कुमार कुशवाहाले ८३३ तथा राष्ट्रिय प्रजातन्त्र पार्टीका दिलिप कुमार शर्माले ८०९ मत प्राप्त गरेका छन्।
त्यस्तै राष्ट्रिय परिवर्तन पार्टीका सर्वेन्द्र खनालले ४६४, उज्यालो नेपाल पार्टीका सन्तोष कुमार गुप्ताले २२०, श्रम संस्कृति पार्टीका गोपाल बहादुर खत्रीले १४४ तथा स्वतन्त्र उम्मेदवार भोला मियाँले १३४ मत प्राप्त गरेका छन्।
फराकिलो मतान्तरसहितको अन्सारीको विजयले बारा–४ मा रास्वपा र अन्सारीकाे प्रभाव थप मजबुत भएको राजनीतिक विश्लेषकहरू बताउँछन्।
