वीरगंज । पर्सा निर्वाचन क्षेत्र नम्बर–१ बाट प्रतिनिधि सभा सदस्य पदका लागि भएको निर्वाचनमा पराजित भएपछि नेकपा (एमाले)का उम्मेदवार तथा पूर्वमन्त्री प्रदीप यादवले निर्वाचन परिणामलाई सम्मानपूर्वक स्वीकार गरेका छन्।
यादवले सामाजिक सञ्जालमार्फत प्रतिक्रिया जनाउँदै लोकतन्त्रको सुन्दरता जनताको मतलाई सर्वोच्च मान्नुमा रहेको उल्लेख गरेका छन् । उनले सोही विश्वासका साथ नेकपा (एमाले) पर्सा निर्वाचन क्षेत्र नम्बर–१ बाट सूर्य चुनाव चिह्न लिएर प्रतिनिधि सभा सदस्यको निर्वाचनमा सहभागी भएको बताए।
यसपटक अपेक्षित परिणाम हासिल गर्न नसके पनि आफूले निर्वाचनको परिणामलाई पूर्ण सम्मानका साथ स्वीकार गरेको उल्लेख गर्दै यादवले जनताको निर्णय सधैं आफ्नो लागि मार्गदर्शक रहने बताएका छन्।
निर्वाचन यात्रामा साथ दिने सम्पूर्ण मतदाता, समर्थक, अग्रज, साथीभाइ, युवाशक्ति तथा शुभेच्छुकहरूप्रति उनले हृदयदेखि कृतज्ञता व्यक्त गरेका छन्। साथै निर्वाचन अभियानमा दिनरात खटिने सबै साथीहरू र सहयोगीहरूको मेहनत, समर्पण र साथले आफ्नो यात्रा अर्थपूर्ण बनेको उनले उल्लेख गरेका छन्।
यसैबीच उनले प्रतिनिधि सभा सदस्यमा विजयी राष्ट्रिय स्वतन्त्र पार्टीका उम्मेदवार बुद्धि प्रसाद पन्त (हरि पन्त)लाई हार्दिक बधाई तथा सफल कार्यकालको शुभकामना पनि दिएका छन्। क्षेत्र र राष्ट्रको हितका लागि पन्तले उत्कृष्ट काम गर्ने विश्वास समेत व्यक्त गरेका छन्।
निर्वाचनमा हार भए पनि जनताको सेवा गर्ने आफ्नो प्रतिबद्धता अडिग रहने भन्दै यादवले समाज र राष्ट्रको समृद्धिका लागि निरन्तर समर्पित रहने बताएका छन्। साथै उनले फेरि एकपटक सम्पूर्ण मतदाता, समर्थक तथा शुभेच्छुकहरूप्रति हार्दिक धन्यवाद व्यक्त गरेका छन्।
