वीरगंज । नेकपा (एमाले)को तर्फबाट पर्सा निर्वाचन क्षेत्र नम्बर–२ की प्रतिनिधि सभा सदस्य उम्मेदवार रिमा कुमारी यादवले निर्वाचनपछि मतदाता, अभिभावक, युवा तथा महिलालाई धन्यवाद दिएकी छन्।
उनले मतदानमार्फत आफूलाई गरिएको विश्वास, दिइएको माया र सहयोगका लागि सबैप्रति आभार व्यक्त गरेकी छन्।
सामाजिक सञ्जाल फेसबुकमा स्टाटस लेख्दै उम्मेदवार यादवले लोकतन्त्रमा जनताको निर्णय नै सर्वोपरि हुने भएकाले नागरिकले आफ्नो मतमार्फत व्यक्त गरेको निर्णयलाई आफूले पूर्ण रूपमा सम्मान गर्ने उल्लेख गरेकी छन्।
उनले निर्वाचनमा विजयी भएका राष्ट्रिय स्वतन्त्र पार्टी (रास्वपा)का उम्मेदवार सुशिल साह कानुलाई बधाई दिँदै सफल कार्यकालको शुभकामना समेत व्यक्त गरेकी छन्।
यादवले पर्सा–२ को विकास, शिक्षा, स्वास्थ्य, कृषि, रोजगार र आधारभूत पूर्वाधारलाई मजबुत बनाउन इमान्दारिता पूर्वक काम हुने विश्वास व्यक्त गरेकी छन्।
आफू राजनीतिमा सेवा भावले प्रवेश गरेको उल्लेख गर्दै उनले पर्सा–२ का जनताको सेवा, हकअधिकार र विकासका लागि निरन्तर सक्रिय रहने प्रतिबद्धता व्यक्त गरेकी छन् । साथै उनले सबै मतदातालाई मनदेखि नै धन्यवाद दिएकी छन्।
