काठमाडौं । अख्तियार दुरुपयोग अनुसन्धान आयोगले चिकित्सा विज्ञान राष्ट्रिय प्रतिष्ठान अन्तर्गत वीर अस्पतालमा कार्यरत लेखा अधिकृत ढुण्डी राज दाहालविरुद्ध घुस लिएको आरोपमा विशेष अदालतमा मुद्दा दायर गरेको छ।

आयोगका अनुसार दाहालले विभिन्न सप्लायर्स कम्पनी तथा ठेकेदारहरूको बिल भुक्तानी गर्ने क्रममा सेवाग्राहीसँग घुस/रिसवत लिएको उजुरीका आधारमा अनुसन्धान अघि बढाइएको थियो । सोही क्रममा खटिएको टोलीले उनलाई कार्यालयबाटै रु. १ लाख २० हजार ८५० सहित नियन्त्रणमा लिएको जनाएको छ।

अनुसन्धानबाट दाहालले अस्पतालको आन्तरिक स्रोतबाट भुक्तानी दिने क्रममा गैरकानुनी लाभ लिने उद्देश्यले योजनाबद्ध रूपमा विभिन्न कम्पनी तथा फर्मका प्रतिनिधिसँग मोलमोलाई गरी घुस लिएको पुष्टि भएको आयोगले जनाएको छ। विशेषगरी उनले भुक्तानी प्रक्रियालाई सहजीकरण गरिदिने सर्तमा सेवाग्राहीसँग रु. ९३ हजार ८५० घुस लिएको स्थापित भएको छ।

उक्त कार्य भ्रष्टाचार निवारण ऐन, २०५९ को दफा ३(१) बमोजिम कसुर ठहर हुने भन्दै आयोगले सोही रकम बराबर बिगो कायम गरी कैद तथा जरिवाना सजायको मागदाबी सहित विशेष अदालत काठमाडौंमा आरोपपत्र दायर गरेको आयोगका सहायक प्रवक्ता गणेश बहादुर अधिकारीले जानकारी दिएका छन् ।

काठमाडौं । प्रधानमन्त्री बालेन्द्र शाहले नेपालस्थित विभिन्न कूटनीतिक नियोगका राजदूत तथा प्रमुखहरूसँग भेटघाट गर्दै नेपाल सरकार मित्र राष्ट्रहरूसँगको सम्बन्धलाई अझ सुदृढ बनाउन प्रतिबद्ध रहेको बताएका छन्।

बुधबार प्रधानमन्त्री तथा मन्त्रिपरिषद्को कार्यालयमा आयोजित सामूहिक शिष्टाचार भेटका अवसरमा प्रधानमन्त्री शाहले नेपालले सबै देशहरूसँगको सम्बन्धलाई उच्च महत्व दिने, आपसी विश्वासमा आधारित सम्बन्ध कायम राख्ने र पारस्परिक लाभमा आधारित साझेदारी विस्तार गर्ने नीति लिएको उल्लेख गरे।

“नेपाल सन्तुलित र व्यावहारिक वैदेशिक नीतिको अनुसरण गर्दै आएको छ । हाम्रो बाह्य सम्बन्ध साझा समृद्धिको लक्ष्यद्वारा निर्देशित छ,” प्रधानमन्त्री शाहले भने, “नेपालको विकास र समृद्धिका लागि निरन्तर सद्भाव र सहयोग प्रदान गर्ने सबै मित्र राष्ट्रप्रति हामी आभारी छौँ।”

विश्वका विभिन्न भागमा जारी द्वन्द्वप्रति चिन्ता व्यक्त गर्दै उनले ती द्वन्द्वहरूले सर्वसाधारण नागरिकलाई सबैभन्दा बढी प्रभावित पार्ने भएकाले विश्व शान्ति साझा प्राथमिकता हुनुपर्नेमा जोड दिए । उनले शान्ति स्थापनाका लागि अन्तर्राष्ट्रिय समुदायबीच सहकार्य आवश्यक रहेको बताए।

प्रधानमन्त्री शाहले नेपालमा लगानीका लागि अनुकूल वातावरण निर्माण, उद्यमशीलता प्रवर्द्धन तथा दिगो विकासलाई प्राथमिकतामा राखिएको जानकारी गराए। उनले राष्ट्रिय हितअनुकूल हुने गरी नेपाललाई क्षेत्रीय तथा वैश्विक आर्थिक संरचनामा अझ मजबुत रूपमा समेट्ने लक्ष्य सरकारको रहेको उल्लेख गरे।

“नयाँ सरकार हुनु भनेको निरन्तरताबाट विच्छेद हुनु होइन,” उनले भने, “हामी राजनीतिक स्थायित्व कायम राख्न र नीतिगत दिशालाई स्थिर तथा पूर्वानुमानयोग्य बनाइराख्न दृढ प्रतिबद्ध छौँ।”

उनले विकास, व्यापार, लगानी, जलवायु कार्य तथा जनस्तरको सम्बन्ध विस्तारजस्ता क्षेत्रमा मित्र राष्ट्रहरूसँग सहकार्य अघि बढाउन सरकार इच्छुक रहेको स्पष्ट पारे।

यसैबीच, विदेशमा रहेका नेपाली नागरिकको सुरक्षा र हित संरक्षण सरकारको प्रमुख प्राथमिकतामा रहेको विषयमा समेत प्रधानमन्त्री शाहले विशेष जोड दिएका छन्।