वीरगंज । जेन जि यूथ फोर्स पर्साले आफ्नो नाममा भ्रामक रूपमा नयाँ जिल्ला समिति गठन गर्ने भन्दै फैलाइएका सूचनाप्रति गम्भीर आपत्ति जनाएको छ ।
सोमबार जारी प्रेस विज्ञप्तिमार्फत संगठनले केही व्यक्तिहरूले राजनीतिक स्वार्थका लागि सामाजिक सञ्जालमा “जेन जि पर्सा गठन गर्दैछु” भन्ने गलत प्रचार गरिरहेको उल्लेख गर्दै उक्त दाबी पूर्णतः असत्य र भ्रम सिर्जना गर्ने खालको रहेको स्पष्ट पारेको छ ।
विज्ञप्तिमा जेन जि यूथ फोर्स पर्साको जिल्ला समिति पहिले नै विधिवत् रूपमा गठन भइसकेको जनाउँदै पुनः नयाँ समिति गठन गर्ने प्रयास केवल राजनीतिक चलखेल र संगठनको नाम दुरुपयोग गर्ने कार्य भएको बताइएको छ ।
संगठनले आफूलाई जेन जि अभियानको अगुवा बताउने केही व्यक्तिहरू वास्तविक जेन जि उमेर समूहमै नपर्ने र भदौ २३ गते सम्पन्न आन्दोलनमा समेत सहभागी नभएको दाबी गरेको छ । आन्दोलनलाई व्यक्तिगत स्वार्थ पूरा गर्ने माध्यम बनाउने प्रयासप्रति संगठनले कडा आपत्ति जनाएको छ ।
त्यस्तै, भदौ २३ गतेको आन्दोलन आधिकारिक रूपमा फिर्ता भइसकेको अवस्थामा भदौ २४ गते भएका गतिविधिमा संलग्न व्यक्तिहरूको जेन जि यूथ फोर्स पर्सासँग कुनै सम्बन्ध नरहेको स्पष्ट पारिएको छ । सो दिन सरकारी सम्पत्तिमा क्षति पुर्याउने कार्यमा संलग्न व्यक्तिहरू स्वयं जिम्मेवार रहने पनि विज्ञप्तिमा उल्लेख छ ।
जेन जि यूथ फोर्स पर्साले आफू सधैं शान्तिपूर्ण, जिम्मेवार र सकारात्मक सामाजिक परिवर्तनको पक्षमा रहेको जनाउँदै संगठनको नाम दुरुपयोग गर्ने, भ्रम फैलाउने तथा आन्दोलनलाई बदनाम गर्ने प्रयास स्वीकार्य नहुने चेतावनी दिएको छ ।
यस्ता गतिविधि दोहोरिएमा कडा विरोधमा उत्रिने र आवश्यक कदम चाल्न बाध्य हुने संगठनले जनाएको छ । साथै, आन्दोलन कुनै व्यक्तिको निजी स्वार्थ पूरा गर्ने माध्यम नभएको पनि संगठनले स्पष्ट पारेको छ ।
