वीरगंज । पर्साको धोबिनी गाउँपालिका–३ हरिहरपुर निवासी नेपाली काङ्ग्रेसका वडा सभापति स्वर्गीय बासुदेव तिवारीको श्रद्धाञ्जली सभा मंगलबार सम्पन्न भएको छ ।
६२ वर्षीय तिवारीको निधन भएको १३औँ दिनको पुण्यतिथिको अवसरमा नेपाली काङ्ग्रेस पर्सा क्षेत्र नं. ४ समितिको आयोजनामा श्रद्धाञ्जली सभा सम्पन्न भएको हो ।
कार्यक्रममा बोल्दै पूर्व मन्त्री तथा काङ्ग्रेस नेता रमेश रिजालले तिवारीको निधनले नेपाली काङ्ग्रेसलाई ठूलो क्षति पुगेको बताएका छन् । उनले तिवारीको निधनले पार्टीसँगै स्थानीय समाजमा समेत अपूरणीय क्षति पुगेको उल्लेख गरे ।
क्षेत्रीय सभापति श्रीकान्त प्रसाद यादवको सभापतित्वमा सम्पन्न उक्त कार्यक्रममा मधेश प्रदेशका वन तथा वातावरण मन्त्री शंकर चौधरी, काङ्ग्रेस पर्साका सह–सचिव नवीन सिंह, नेता बशिष्ठ नारायण कुर्मी, श्याम पटेल लगायतका नेता तथा कार्यकर्ताको उपस्थिति रहेको थियो ।
स्वर्गीय तिवारीको गत चैत १२ गते राति उपचारका क्रममा वीरगञ्जस्थित नेशनल मेडिकल कलेजमा असामयिक निधन भएको थियो ।
