काठमाडौं । अख्तियार दुरुपयोग अनुसन्धान आयोगले गण्डकी प्रदेशका एक लेखा अधिकृतविरुद्ध भ्रष्टाचार तथा सम्पत्ति शुद्धीकरण (मनि लाउन्डरिङ्ग) सम्बन्धी मुद्दा विशेष अदालत काठमाडौंमा दायर गरेको छ ।
आयोगका अनुसार भौतिक पूर्वाधार विकास तथा यातायात व्यवस्था मन्त्रालय, पोखरा, कास्कीमा कार्यरत लेखा अधिकृत (अधिकृत आठौँ तह) झलक शर्मा पौडेलले पदीय मर्यादा दुरुपयोग गर्दै गैरकानुनी रुपमा ठूलो परिमाणमा सम्पत्ति आर्जन गरेको ठहर गरिएको छ । अनुसन्धानबाट पौडेलले गैरकानुनी स्रोतबाट आर्जित सम्पत्ति लुकाउन विभिन्न व्यक्तिहरूसँग ऋण सापटी लिएको झुटो विवरण तयार गरी बैंक तथा वित्तीय संस्थामार्फत कारोबार गरेको खुल्न आएको आयोगले जनाएको छ।
पौडेलविरुद्ध कुल रु. ६ करोड २६ लाख ९३ हजार १२९ रुपैयाँ ८२ पैसा बराबरको अवैध सम्पत्ति आर्जन गरेको आरोपमा यसअघि नै विशेष अदालतमा मुद्दा दायर भई सुनुवाइ भइरहेको छ । त्यसमध्ये रु. २ करोड ५१ लाख ३४ हजार ४६२ रुपैयाँ १४ पैसा बैंक तथा सहकारी खातामा गैरकानुनी रूपमा जम्मा गरेको देखिएको छ। आयोगले थप अनुसन्धानमा सो रकमको स्रोत लुकाउन करिब रु. २ करोड ५३ लाख बराबरको कारोबार ‘वेब अफ ट्रान्जेक्सन’ मार्फत गरिएको निष्कर्ष निकालेको छ।
सो आधारमा रु. २ करोड ५८ लाख ६७ हजार ३२४ रुपैयाँ ५३ पैसा बराबरको सम्पत्ति शुद्धीकरण गरेको अभियोगमा पुनः आरोपपत्र दायर गरिएको हो । आयोगले सोही रकम बिगो कायम गर्दै कैद तथा जरिवाना सजाय माग गरेको छ भने पौडेलको खातामा रहेको रु. १ करोड ७० लाख १३ हजार ५० रुपैयाँ ७७ पैसा जफत गर्न पनि अदालतसमक्ष मागदाबी गरिएको छ।
यस्तै, उक्त गैरकानुनी सम्पत्ति लुकाउन सहयोग गरेको आरोपमा उनकी श्रीमती हुमा कुमारी उपाध्यायसहित जमुना कुमारी रोका क्षेत्री, हरिप्रसाद पौडेल र शान्ति दराई पौडेललाई समेत प्रतिवादी बनाइएको छ । उनीहरूलाई विभिन्न रकम बराबरको बिगो कायम गरी मुख्य कसुरदारको आधा सजाय माग गरिएको आयोगका सहायक प्रवक्ता गणेश बहादुर अधिकारीले जानकारी दिए ।
