वीरगंज । राष्ट्रिय सहकारी बैंक लिमिटेड वीरगञ्ज शाखाको आयोजना तथा को–अपरेटिभ म्यानेजर्स क्लब, पर्साको व्यवस्थापनमा “ऋण व्यवस्थापनमा क्षमता विकास” सम्बन्धी तालिम सोमबारदेखि सुरु भएको छ ।
सहकारी ज्ञान तथा मार्गदर्शन शृङ्खला–३ अन्तर्गत सदस्य शिक्षा कार्यक्रम ०८२/०८३ मा सञ्चालन भइरहेको उक्त तालिममा पर्सा र बारा जिल्लाका विभिन्न सहकारी संघ–संस्थाका व्यवस्थापक तथा प्रतिनिधिहरूको सहभागिता रहेको छ ।
तालिमको उद्घाटन सत्रमा को–अपरेटिभ म्यानेजर्स क्लब, पर्साका संस्थापक अध्यक्ष जिष्णु बराल, पूर्व अध्यक्ष रवि भूषण श्रीवास्तव, राष्ट्रिय सहकारी बैंक वीरगञ्ज शाखाका प्रमुख समीर मानन्धर तथा क्लबका वर्तमान अध्यक्ष चन्देश्वर चौरासियाको उपस्थिति रहेको थियो ।
दुई दिनसम्म सञ्चालन हुने उक्त तालिममा ऋण लगानी व्यवस्थापन, ऋणसम्बन्धी नीतिगत व्यवस्था, ऋण विश्लेषण, ऋण सदुपयोगिता निरीक्षण अभ्यास, ऋण सेवा निर्माण अभ्यास, ऋण असुलीमा देखिने समस्या, सहभागी संस्थाहरूको आधारभूत स्तरीकरणबाट प्राप्त ऋण सूचकहरूको विश्लेषण तथा बैंकका कर्जासम्बन्धी विभिन्न प्रोडक्टका विषयमा प्रशिक्षण प्रदान गरिनेछ ।
तालिममा राष्ट्रिय सहकारी बैंकका तालिम अधिकृत मनोज लामिछानेले सहजिकरण गरिरहेका छन् ।
