वीरगंज । नेपाल सरकारका खानेपानी मन्त्री प्रदीप यादवले जनता समाजवादी पार्टी नेपाल (जसपा नेपाल) का अध्यक्ष उपेन्द्र यादव नेतृत्वको अधिनायकवादी सोच र सम्झौता गर्ने प्रवृत्तिको कारण जनता समाजवादी पार्टी (जसपा) गठन गरिएको बताउनु भएको छ ।
शुक्रवार वीरगञ्जमा आयोजित जनता समाजवादी पार्टी (जसपा) निकट सङ्घीय शिक्षक फोरमको पर्सा जिल्ला कार्यसमिति र वीरगञ्ज महानगर कमिटी घोषणा कार्यक्रमलाई प्रमुख अतिथिका रूपमा सम्बोधन गर्नुहुँदै मन्त्री यादवले जसपा नेपालको नेतृत्वले अधिनायकवादलाई प्रश्रय दिएर, धोका दिने बानी बसालेर पार्टीको मूल उद्देश्यलाई कमजोर बनाएको कारण जसपाको स्थापना गरिएको बताउनुभएको हो ।
उहाँले भन्नभयो, “जसपा नेपालका अध्यक्ष उपेन्द्र यादवले सत्ताको लोभमा मधेससँग दर्जनौँ पटक धोका गरे । पार्टीमाथि तानासाह जस्तो एकलौटी शासन गरे । असह्य भएर हामीले पार्टीबाट छुटिन निर्णय गर्यौँ ।”
मन्त्री यादवले मधेसमा मात्र सीमित रहने योजना नभएको भन्दै जसपा समग्र नेपालमा स्थायी रूपले स्थापित हुने दृढता व्यक्त गर्नुभयो । उहाँले भन्नुभयाे, “अब हामी मधेसको मुद्दालाई मात्र होइन, नेपालभरिका नागरिकहरूको हितका लागि पनि काम गर्नेछौँ । जसपाको नीति र दृष्टिकोणले समाजमा नयाँ प्रकारको सकारात्मक परिवर्तन ल्याउनेछ, जहाँ युवा, महिला, र अन्य समावेशी समूहको सहभागिता महत्त्वपूर्ण हुनेछ ।”
पर्सा जिल्लामा मात्र नभई मधेसभरि जसपा नेपालको छिट्टै अन्त्य हुने दाबी गर्दै मन्त्री यादवले थप्नुभयो, “जसपा नेपाल विभाजन हुनु अनिवार्य थियो, किनकि वर्तमान नेतृत्वले मधेसको मुद्दालाई कमजोर बनाउँदै आएको थियो । अब हामीले स्थापित गरेको जसपा जनताको भावनालाई सम्बोधन गर्दै देशभरि सशक्त रूपमा अघि बढ्नेछ ।”
उहाँले पार्टीको नीतिहरू र नवप्रवर्तनलाई सम्बोधन गर्दै यसले समाजका सबै वर्गहरूको जीवनस्तर उकास्न ठोस कदम चाल्ने बताउनुभयो । “हामी राजनीतिक सीमारेखामा सीमित रहन चाहन्नौँ, हाम्रो उद्देश्य जनताको जीवनमा प्रत्यक्ष सुधार ल्याउने हो । जसपाले विकासका कार्यहरूमा केन्द्रित हुँदै स्थानीय समस्या समाधान गर्नेछ र जनताको अपेक्षाहरू पूरा गर्ने दिशामा कदम चाल्नेछ,” उहाँले भन्नुभयो ।
मन्त्री यादवले पर्सामा शिक्षक फाेरमकाे नयाँ नेतृत्वले जसपा पार्टीलाईपनि अझ सशक्त बनाउने विश्वास लिएको बताए ।उनले जनताकाे सेवामा जसपा अझ सकृयताका साथ लाग्ने भन्दै एकताबद्ध संगठन र जन समर्पित नेतृत्वको बलमा साझा उद्देश्यहरू हासिल गर्ने लक्ष्यमा अगाडि बढ्न नेताकार्यकर्तालाई निर्देशनपनि दिए।
कार्यक्रममा वीरगञ्ज महानगरपालिकाका प्रमुख राजेशमान सिंहले पार्टीलाई सुदृढ बनाउन र जसपाको राजनीतिक रणनीतिलाई सशक्त बनाउन एकजुट भएर लाग्नुपर्ने बताउनुभयो । उहाँले भन्नुभयो, “महिला सशक्तीकरण र युवा नेतृत्व विकासमा विशेष ध्यान दिन आवश्यक छ । त्यस्तै अन्य पिछडिएका समुदायलाई पनि समेटेर सबै वर्गको प्रतिनिधित्व हुने किसिमको पार्टी हामीले स्थापित गर्नुपर्छ ।”
प्रमुख सिंहले कार्यकर्ताहरूलाई चुनाव जित्नका लागि मात्र नभई जनताको हितमा काम गर्न प्रेरित गर्दै भन्नुभयो, “जसपाले जनताको जीवनमा सुधार ल्याउनका लागि हरेक सम्भावनाको खोजी गर्नेछ । अब यो पार्टी सबै तह र वर्गका नागरिकहरूको आवाज बन्नेछ ।”
कार्यक्रममा हरिन्द्र प्रसाद चाैरसियाकाे अध्यक्षतामम संघीय शिक्षक फाेरमकाे ५१ सदस्यीय जिल्ला कार्यसमिति गठन गरि घाेषणाा गरियाे। जिल्ला कार्यसमितिको सहअध्यक्षमा पिंकी यादव,सचिवमा रामाधार प्रसाद साह,सहसचिवमा द्वारिका चाैहान र काेषाध्यक्षमा रेणु श्रेष्ठ रहेका छन्।
यस्तै कार्यक्रममा संघीय शिक्षक फाेरमकाे वीरगन्ज महानगर कार्यसमितिपनि घाेषणा गरियाे।
मन्त्री यादवकाे प्रमुख आतिथ्यता तथा वीरगन्ज महानगरपालिकाका मेयर एंव जसपाका केन्द्रीय सदस्य राजेशमान सिंहकाे विशेष आतिथ्यतामा भएको कार्यक्रममा जसपाका केन्द्रीय सदस्य माेहन चाैधरी,संघीय परिषद सदस्य विपिन यादव,जिल्ला अध्यक्ष सिंगासन साह तेली,महानगर अध्यक्ष ईश्वरचन्द्र यादव, नेताहरु तबरेज अहमद,असलम आलम,वीरगन्ज-१० का वडाध्यक्ष सुशील साह कानु,वीरगन्ज-३का वडाध्यक्ष बैजुलाल स्वर्णकार लगायतकाकाेपनि सहभागिता थियाे।