वीरगंज । वीरगंज महानगरपालिकाकाे वडा नं. १० स्थित बजरंग टाेलमा रहेकाे शिवबाबा फुड प्राेडक्टमा शनिबार सशस्त्र प्रहरीले छापामारी गरि अवैध रुपमा राखिएकाे चिनी बरामद गरेकाे छ ।
विशेष सुचनाकाे आधारमा प्रस्तावित सीमा सुरक्षा गुल्म बिरगंजका सशस्त्र प्रहरी नायब उपरिक्षक सुरज रिजालको कमाण्डमा खटिएको सशस्त्र प्रहरी र वीरगंज भन्सार कार्यालय वीरगंजबाट नायव सुब्बा राजन भुजेलसहित भन्सार कर्मचारीकाे संयुक्त टोलीले छापामारी गरि पुजामिश्री २४५ के.जि. र चिनि ६३५ के.जि. बरामद गरेकाे हाे ।
बजरंगटाेलस्थित राधे राधे मन्दिर नजिक रहेकाे रमेश शर्माकाे घरमा भाडा लिई बलिराम साहले संचालन गरि राखेको शिवबाबा फुड प्रोडक्टमा भारतबाट अबैध रुपमा भन्सार छली लुकाई छिपाई गोदाम गरि राखेको अन्दाजि मुल्य ५८ हजार ५० रुपैया बराबरको पुजामिश्री २४५ के.जि. र चिनि ६३५ के.जि. बरामद भएकाे सशस्त्र प्रहरी नायब उपरिक्षक (डिएसपी) सुरज रिजालले वताए ।
बरामद पुजामिश्री र चिनी वीरगंज भन्सार कार्यालयको गोदाममा राखिराखेको र भन्सार बुझाउने प्रकृयामा रहेको डिएसपी रिजालले वताए ।
सशस्त्र प्रहरीकाे टाेली पुग्न अघि उक्त प्राेडक्टमा रहेकाे अरु अवैध चिनीहरु ठेलामा राखेर अन्यत्र सारिएकाे स्थानियहरुले वताएका छन् । स्थानिय प्रत्यक्षदर्शीका अनुसार उक्त प्राेडक्टमा दिनहु साइकलमा भारतबाट अवैध चिनी ल्याएर तस्करहरु भण्डारण गर्ने गरेका थिए ।
नाम मात्रकाे मिश्री बनाउन संचालित कारखानामा तस्करी माध्यमले भारतबाट ल्याइएकाे चिनी नेपालकाे विभिन्न ठाउँमा पठाउने गरिएकाे छ ।