वीरगंज । सशस्त्र प्रहरीले वीरगंजबाट ठूलो परिमाणमा शीलबन्दी मदिरा बरामद गरेको छ । शनिबार राति टाटासुमो गाडीमा लोड गरेर भारत तस्करी गर्न लागिएको ९६ कार्टुन शीलबन्दी मदिरा सशस्त्र प्रहरीले बरामद गरेकाे हाे ।
सीमा सुरक्षा गुल्म अलौंबाट खटिएको सशस्त्र प्रहरीको टोलीले भारतसंग जोडिएको वीरगंज महानगरपालिकाकाे वडा नम्बर १७ कोनियाबाट भारत लग्न लागिएकाे मदिरा बरामद भएकाे सशस्त्र प्रहरीले जनाएकाे छ ।
सशस्त्र प्रहरीले शनिबार मध्यरातमा बीआर १० जे ८२०१ नम्बरको टाटासुमो गाडी नाकामा रोकेर चेकजाँच गरेको थियो । त्यसक्रममा उक्त गाडीबाट कस्तूरी ब्राण्डको ९६ कार्टुन शिलबन्दी मदिरा बरामद भएको पर्साका सशस्त्र प्रहरी उपरक्षिक किशन कर्मचार्यले जानकारी दिए ।
मदिरासहितको उक्त गाडीपनि नियन्त्रणमा लिएको उनले बताए । बरामद गरिएको मदिराको बजार मूल्य १ लाख ३३ हजार ५०० रुपैयाँ मुल्यांकन गरिएको जानकारी उनले दिए । सशस्त्र प्रहरीले गाडी रोक्ने बित्तिक्कै त्यसका चालक मदिरासहितको गाडी छाडेर फरार भएकाले उनलाई भने पक्राउ गर्न नसकिएको कर्मचार्यले बताए ।
बरामद गरिएका मदिरा र गाडी आवश्यक कारबाहीका लागि आइतबार वीरगंज भन्सार कार्यालयमा बुझाइएको जानकारी उनले दिए । भारतको बिहार प्रान्तमा करिब एक दशक यता देखि मदिराको उत्पादन, ओसारपसार, बिक्रिवितरण र सेवनमा प्रतिबन्ध लगाइएको छ ।
जसका कारण पर्सा, बारा लगायत मधेसका जिल्लाका नाका हुँदै नेपालबाट बिहारमा मदिराको तस्करी हुदैं आएको छ ।