वीरगञ्ज, २० असाेज ।
वीरगञ्जको नारायणी उपक्षेत्रिय अस्पतालमा शनिबार बिहान सरसफाई गरिएको छ । व्यवस्थित वीरगञ्ज अभियान अन्तर्गत अस्पतालको सरसफाई गरिएको अभियानका संयोजक दिलिपराज कार्कीले बताए ।
वीरगञ्जलाई व्यवस्थित बनाउन नागरिक स्तरबाट थालिएको अभियान मार्फत साप्ताहिक रुपमा सार्वजनिक स्थलको सरसफाई गर्ने अभियान अस्पतालबाट शुरु गरिएको उनको भनाई छ ।
प्रमुख जिल्ला अधिकारी लोकनाथ पौड्याल, प्रहरी उपरीक्षक रेवती ढकाल लगायतकोे सहभागीतामा नेपाली सेना, नेपाल प्रहरी, सशस्त्र प्रहरी, महानगरपालिकाका सरसफाई कर्मचारी, व्यवस्थित वीरगञ्जका अभियन्ता, स्थानीय जनप्रतिनीधिहरु समेतको सहभागीतामा सरसफाई गरिएको थियो ।
अस्पतालको क्वाटरमा बस्ने चिकित्सक, स्टाफ नर्स लगायत अन्य कर्मचारीहरुले समेत सरसफाईमा ध्यान नदिने गरेको पाईएको छ । क्वाटरहरुको नियमित सरसफाई नभएका कारण घरहरुमा झाडी बुट्यान उम्रिएको, क्वाटर वरपर झाडी बनेको, जथाभावी फोहोर देखिएको वीरगञ्ज महानगरपालिकाका प्रमुख प्रशासकीय अधिकृत भिष्म भुषालले बताए ।
प्रमुख जिल्ला अधिकारी पौड्यालले अस्पतालका मेडिकल सुपरीटेन्डेन्ट डा एनामुल हकलाई कर्मचारीहरुलाई बोलाएर बसोबास गरिरहेको ठाउँको सरसफाईका बारेमा ध्यान दिन लगाउन निर्देशन दिएका छन् ।
व्यवस्थित वीरगंज अभियान अन्तर्गत असोज २ गतेदेखी वीरगंजमा ट्राफिक व्यवस्थापन, छाडा चौपाया नियन्त्रण, टेम्पो, इरिक्सा व्यवस्थापन र व्यवस्थित पार्किगका लागि काम भैरहेको छ ।
सोही क्रममा सातवटा छाडा चौपाया पनि नियन्त्रणमा लिइएको छ । वीरगञ्जको मुर्ली सातवटा घोडालाई नियन्त्रणमा लिएको अभियानका सह संयोजक प्रकाश खेतानले बताए ।