वीरगंज । वीरगंज महानगरपालिकाको प्रमुख प्रशासकीय अधिकृतमा सरुवा भएर आएका सहसचिव बसन्त बहादुर बोहराले बिहीबार कार्यालयमा हाजिर भई कार्यभार सम्हालेका छन् ।
संघीय सरकारले जेठ ११ गते बसेको मन्त्रिपरिषद् बैठकबाट २९ जना सहसचिवहरूको सरुवा गर्ने निर्णय गरेको थियो । सोही निर्णयअनुसार भूमि व्यवस्था, सहकारी तथा गरिबी निवारण मन्त्रालयअन्तर्गत कार्यरत सहसचिव बोहरालाई वीरगंज महानगरपालिकाको प्रमुख प्रशासकीय अधिकृतका रूपमा खटाइएको थियो ।
सरकारले सरुवा निर्णय गरेको १० दिनपछि बोहराले बिहीबार वीरगंज महानगरपालिकामा हाजिर भई जिम्मेवारी सम्हालेका हुन् । उनको आगमनसँगै केही समयदेखि रिक्त जस्तै बनेको प्रमुख प्रशासकीय अधिकृतको पदमा नियमित प्रशासनिक गतिविधि सञ्चालन हुने अपेक्षा गरिएको छ ।
यसअघि फागुन १२ गते तत्कालीन संघीय मामिला तथा सामान्य प्रशासन मन्त्री सुशीला कार्कीको कार्यकालमा रेशमलाल कँडेललाई वीरगंज महानगरपालिकाको प्रमुख प्रशासकीय अधिकृतमा सरुवा गरिएको थियो । तर महानगर प्रमुख राजेशमान सिंहले महानगरपालिकाको सहमति बिना गरिएको सरुवाप्रति असहमति जनाउँदै निर्णय पुनर्विचार गर्न मन्त्रालयलाई पत्राचार गरेका थिए ।
कँडेलको सरुवालाई लिएर महानगर र संघीय सरकारबीच विवाद चर्किएको थियो । कँडेल वैशाख २८ गते रमाना लिएर वीरगंज महानगरमा हाजिर हुन आए पनि महानगरले उनलाई कार्यभार ग्रहण गर्न दिएको थिएन । जेठ ५ गते बसेको जनप्रतिनिधिहरूको बैठकले समेत कँडेललाई हाजिर हुन नदिने र संघीय सरकारले जबरजस्ती गरे महानगर कार्यालयमा तालाबन्दी गरेर साँचो मन्त्रालयमा बुझाउने निर्णय गरेको थियो ।
लामो समयदेखि जारी विवादका बीच सरकारले पुनः सरुवा गर्दै बसन्त बहादुर बोहरालाई वीरगंज पठाएको हो । बोहराको हाजिरीसँगै महानगरको आर्थिक तथा प्रशासनिक कार्य पुन: गति लिने अपेक्षा गरिएकाे छ ।
