रक्सौल । रक्सौलस्थित आश्रम रोडमा रहेको सेवक संजय नाथ काली न्यास विद्यालय परिसरमा काली सेनाको नयाँ कार्यालय उद्घाटन गरिएको छ । मंगलबार साँझ आयोजित कार्यक्रममा स्थानीय विधायक प्रमोद कुमार सिन्हाले कार्यालयको उद्घाटन गरेका हुन् ।
उद्घाटन समारोहमा काली मन्दिरका पीठाधीश्वर सेवक संजय नाथसहित विभिन्न क्षेत्रका समाजसेवी, राजनीतिक व्यक्तित्व तथा महिला सदस्यहरूको उल्लेखनीय उपस्थिति रहेको थियो ।
कार्यक्रमलाई सम्बोधन गर्दै विधायक प्रमोद कुमार सिन्हाले काली सेनाले महिलाहरूलाई स्वरोजगार तथा उद्यमशीलतासँग जोड्ने प्रशंसनीय कार्य गरिरहेको बताए । गृह उद्योगमार्फत महिलाहरूलाई रोजगारी उपलब्ध गराई आत्मनिर्भर बनाउन संस्थाले महत्वपूर्ण योगदान पुर्याएको उल्लेख गर्दै उनले महिलाको आर्थिक सशक्तीकरणका लागि यस्ता पहल समयको आवश्यकता रहेको बताए ।
उनले काली मन्दिरका पीठाधीश्वर सेवक संजय नाथले संस्थालाई निरन्तर सहयोग गरिरहेको उल्लेख गर्दै काली सेनाको विकास तथा विस्तारका लागि सरकारी र गैरसरकारी तहबाट आवश्यक सहयोग उपलब्ध गराउने प्रतिबद्धता व्यक्त गरे । साथै, संस्थाकी अध्यक्ष पार्वती तिवारीले समाजका पिछडिएका वर्गका महिलाहरूलाई रोजगारमूलक अवसर प्रदान गर्न खेलेको भूमिकाको प्रशंसा गरे ।
कार्यक्रममा बोल्दै पीठाधीश्वर सेवक संजय नाथले महिलाहरूका लागि सकारात्मक र दीर्घकालीन कार्य गर्ने आफ्नो चाहना काली सेनामार्फत साकार भइरहेको बताए। संस्थाको माध्यमबाट धेरै महिलाहरू आत्मनिर्भर बन्दै गएकोमा उनले खुसी व्यक्त गरे ।
काली सेनाकी अध्यक्ष पार्वती तिवारीले हालसम्म संस्थासँग करिब २ हजार ६ सय महिलाहरू आबद्ध भइसकेको जानकारी दिइन् । उनका अनुसार ती महिलाहरूले तिसौरी, अदौरी, अचार लगायतका घरेलु उत्पादन तयार गरी आम्दानी गरिरहेका छन् । संस्थाद्वारा उत्पादित सामग्रीले बजारमा राम्रो प्रतिक्रिया पाइरहेको र नयाँ कार्यालय सञ्चालनमा आएपछि गतिविधि थप प्रभावकारी हुने तथा अझ बढी महिलाहरूलाई रोजगारसँग जोड्न सहज हुने उनले बताइन् ।
कार्यक्रममा भाजपा नेता अजय पटेल, मृत्युन्जय सिंह, समाजसेवी निरुल्लाह खान, कन्हैया सर्राफ, प्रेम गुप्ता, सैफुल आजम, अबरार खान, विमल सर्राफ, दीपू श्रीवास्तव, दीपक श्रीवास्तव, पप्पु साहलगायत विभिन्न क्षेत्रका व्यक्तित्वहरूको उपस्थिति रहेको थियो ।
