वीरगंज । तत्कालीन राजा वीरेन्द्र शाह तथा उनका परिवारको निधन भएको २५औँ स्मृति दिवसको अवसरमा मंगलबार वीरगंजमा श्रद्धाञ्जली सभा सम्पन्न गरिएको छ।
राजभक्त–देशभक्त समूहको आयोजनामा महावीरस्थानमा आयोजित कार्यक्रममा सहभागीहरूले दिवंगत राजा वीरेन्द्र, रानी ऐश्वर्य तथा राजपरिवारका सदस्यप्रति श्रद्धासुमन अर्पण गरेका थिए । कार्यक्रममा स्वर्गीय राजपरिवारको तस्वीरमा माल्यार्पण गर्नुका साथै मौनधारण समेत गरिएको थियो ।
राजभक्त–देशभक्तका अध्यक्ष दिपेन्द्र प्रसाद रौनियारको अध्यक्षतामा सम्पन्न कार्यक्रममा राजावादी अभियन्ता महेन्द्र प्रसाद साह, वीरेन्द्र थापा, रामनारायण साह, पशुपति विक्रम साह, जनक साह, जय नारायण गरौ, रोशनी साह लगायतको उपस्थिति रहेको थियो ।
कार्यक्रममा वक्ताहरूले तत्कालीन राजा वीरेन्द्रको शासनकाललाई स्थिरता, राष्ट्रिय एकता र जनतासँगको निकट सम्बन्धको प्रतीकका रूपमा स्मरण गरेका थिए । उनीहरूले नेपाल र नेपाली जनताप्रति राजा वीरेन्द्रले पुर्याएको योगदानको चर्चा गर्दै उनको व्यक्तित्व र कार्यशैली आज पनि धेरै नेपालीका लागि प्रेरणाको स्रोत रहेको बताए ।
श्रद्धाञ्जली सभामा २०५८ साल जेठ १९ गते भएको नारायणहिटी राजदरबार हत्याकाण्डबारे समेत चर्चा गरिएको थियो । वक्ताहरूले उक्त घटनाबारे अझै पनि आम नागरिकमा विभिन्न जिज्ञासा र शंका कायमै रहेको उल्लेख गर्दै घटनाको सत्यतथ्य सार्वजनिक हुनुपर्ने धारणा व्यक्त गरेका थिए ।
