वीरगंज । पर्साको वीरगंज महानगरपालिका वडा नं. १५ मा भएको घटनाबारे सामाजिक सञ्जाल तथा विभिन्न सञ्चार माध्यममा सार्वजनिक भएका विवरणप्रति स्थानीयवासीहरूले फरक धारणा सार्वजनिक गरेका छन् । उनीहरूले घटनालाई एकपक्षीय रूपमा प्रस्तुत गरिएको दाबी गर्दै वास्तविकता बाहिर ल्याउन निष्पक्ष अनुसन्धानको माग गरेका छन् ।
स्थानीय स्रोतहरूका अनुसार घटनामा घाइते भएका भनिएका सुकदेव साह तुरहाले घटनाको दिन मादक पदार्थ सेवन गरेका थिए । मेडिकल परीक्षण प्रतिवेदनमा समेत उनले मादक पदार्थ सेवन गरेको उल्लेख रहेको दाबी गरिएको छ । स्थानीयका अनुसार मादक पदार्थ सेवनपछि तुरहा गाउँ–टोलमा होहल्ला गर्दै गालीगलौज गरिरहेका थिए ।
उनीहरूका अनुसार राति करिब ११ बजे तुरहा आफ्नो घरभन्दा करिब २ सय मिटर टाढा रहेको गोपाल साह सोनारको घर अगाडि पुगेका थिए । त्यहाँ उनले घरधनीको नाम नै लिएर चर्को स्वरमा गालीगलौज गर्न थालेपछि गोपाल साहका छोरा सनोज सर्राफले सम्झाउने प्रयास गरेका थिए ।
स्थानीयवासीको भनाइमा उक्त क्रममा कुनै योजनाबद्ध आक्रमण नभएको र तुरहा आफैं असन्तुलित भई लड्दा नालामा खसेर टाउकोमा चोट लागेको हो । त्यसलाई ज्यान मार्ने उद्देश्यले गरिएको सामूहिक आक्रमणका रूपमा चित्रण गरिएको भन्दै उनीहरूले असहमति जनाएका छन् ।
यस्तै, घटनासँग जोडेर उठाइएको जग्गा–जमिन विवादको विषयमा पनि स्थानीयहरूले स्पष्टीकरण दिएका छन् । उनीहरूका अनुसार विवाद सम्बन्धित व्यक्तिसँग नभई अन्य व्यक्तिबीच रहेको र त्यसलाई समेत घटनासँग जोडेर गलत ढंगले प्रचार गरिएको छ ।
घटनामा संलग्न भएको आरोप लागेका व्यक्तिहरूले समेत आफूमाथि लगाइएका आरोपहरू निराधार रहेको बताएका छन् । उनीहरूका अनुसार दुई व्यक्तिबीच भएको सामान्य विवादलाई राजनीतिक प्रभाव तथा व्यक्तिगत स्वार्थका कारण गम्भीर आपराधिक घटनाका रूपमा प्रस्तुत गर्ने प्रयास भइरहेको छ । साथै, एक व्यक्तिसँगको विवादलाई आधार बनाएर सम्पूर्ण परिवारका सदस्यहरूलाई मुद्दामा तान्ने र सामाजिक रूपमा बदनाम गर्ने षड्यन्त्र भइरहेको आरोप समेत उनीहरूले लगाएका छन् ।
स्थानीय सरोकारवालाहरूले घटनाको सत्यतथ्य सार्वजनिक गर्न निष्पक्ष छानबिन आवश्यक रहेको बताएका छन् । सामाजिक सञ्जाल तथा एकपक्षीय सूचनाका आधारमा निष्कर्षमा नपुग्न आग्रह गर्दै उनीहरूले कानुनी प्रक्रियामार्फत वास्तविकता बाहिर ल्याउन सम्बन्धित निकायसँग माग गरेका छन् ।
स्थानीयहरूको भनाइ छ, “सत्य तथ्य आरोप–प्रत्यारोपबाट होइन, निष्पक्ष अनुसन्धान र कानुनी प्रक्रियाबाट मात्र बाहिर आउँछ ।”
