वीरगंज । सडक अनुशासनको पालना गराउने तथा बढ्दो सवारी दुर्घटना न्यूनीकरण गर्ने उद्देश्यले पर्सामा ‘ट्राफिक जनचेतनामूलक सप्ताह कार्यक्रम–२०८३’ बुधबारदेखि सुरु भएको छ । मधेश प्रदेश प्रहरी कार्यालय जनकपुर, नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय पथलैया, जिल्ला प्रहरी कार्यालय पर्सा तथा जिल्ला ट्राफिक प्रहरी कार्यालय वीरगंजको संयुक्त आयोजनामा सप्ताहव्यापी कार्यक्रमको शुभारम्भ गरिएको हो ।
असार ३ गतेदेखि ९ गतेसम्म सञ्चालन हुने उक्त कार्यक्रमको उद्घाटन पर्साका सहायक प्रमुख जिल्ला अधिकारी कृष्ण थापाले गरेका हुन् ।
जिल्ला ट्राफिक प्रहरी कार्यालय पर्साका प्रमुख प्रहरी निरीक्षक युवराज कटवालको अध्यक्षतामा सम्पन्न उद्घाटन कार्यक्रममा जिल्ला प्रहरी कार्यालय पर्साका प्रहरी नायब उपरीक्षक (डीएसपी) हरिबहादुर बस्नेत, वडा प्रहरी कार्यालय बिर्ताका प्रमुख प्रहरी निरीक्षक बिक्रम सुबेदी, नेपाल रेडक्रस सोसाइटी पर्साका अध्यक्ष बृजकिशोर पटेल, प्याब्सन पर्साका अध्यक्ष सरोजप्रसाद चौधरी, नेपाल इनोभेटिभ सोसाइटी पर्साका अध्यक्ष कमल चौगाईं तथा ग्रीन सिटी सामुदायिक प्रहरी आदर्शनगरका अध्यक्ष जयप्रकाश खेतानलगायत विभिन्न संघसंस्थाका प्रतिनिधिहरूको सहभागिता रहेको थियो ।
कार्यक्रमअन्तर्गत आयोजित जनचेतनामूलक र्याली वीरगंजको घण्टाघरबाट सुरु भई लिंक रोड, बसपार्क, भानुचोक हुँदै पुनः घण्टाघर पुगेर सम्पन्न भएको थियो । र्यालीमा सहभागीहरूले ट्राफिक नियम पालना, सुरक्षित यात्रा तथा दुर्घटना न्यूनीकरणसम्बन्धी सन्देश लेखिएका प्लेकार्ड र ब्यानर प्रदर्शन गरेका थिए ।
र्यालीमा नेपाल स्काउटका सदस्यहरू, विभिन्न विद्यालयका विद्यार्थी, ट्राफिक प्रहरी, सामाजिक अभियन्ता तथा सर्वसाधारणको उल्लेखनीय सहभागिता रहेको थियो । सहभागीहरूले हेल्मेट र सिटबेल्टको अनिवार्य प्रयोग, मदिरा सेवन गरी सवारी नचलाउने, ओभरस्पिड नगर्ने तथा पैदलयात्रीको सुरक्षालाई प्राथमिकता दिनुपर्ने सन्देश प्रवाह गरेका थिए ।
उद्घाटन समारोहलाई सम्बोधन गर्दै वक्ताहरूले सडक दुर्घटनाबाट हुने मानवीय तथा आर्थिक क्षति न्यूनीकरणका लागि ट्राफिक नियमको प्रभावकारी पालना आवश्यक रहेको बताएका थिए । उनीहरूले ट्राफिक व्यवस्थापनलाई प्रहरीको मात्र नभई सम्पूर्ण नागरिकको साझा जिम्मेवारीका रूपमा लिनुपर्नेमा जोड दिएका थिए ।
आयोजकका अनुसार सप्ताहभर विद्यालय, क्याम्पस, सार्वजनिक स्थल तथा सवारी चालक लक्षित सचेतनामूलक कार्यक्रम, अन्तरक्रिया, पर्चा वितरण, सडक नाटक तथा ट्राफिक नियमसम्बन्धी विभिन्न अभियान सञ्चालन गरिनेछ । कार्यक्रममार्फत नागरिकमा सडक सुरक्षाप्रति जिम्मेवारीबोध अभिवृद्धि गर्दै दुर्घटना न्यूनीकरणमा महत्वपूर्ण योगदान पुग्ने विश्वास गरिएको छ ।
