वीरगंज । परवानीपुर–ड्राइपोर्ट सडकखण्ड अन्तर्गत वीरगंज महानगरपालिका–२१ मा सोमबार भएको सवारी दुर्घटनापछि उपचारका लागि निजी अस्पताल पुर्याइएका घाइतेहरूले अत्यधिक बिल असुल्न खोजिएको आरोप लगाएका छन् । सामान्य चोटपटक लागेका बिरामीलाई केही घण्टाको उपचारमै लाखौं रुपैयाँको बिल थमाइएको भन्दै पीडित पक्षले अस्पताल प्रशासनको चर्को आलोचना गरेका छन् ।
सोमबार दिउँसो करिब १२ बजे परवानीपुर चौकीभन्दा करिब पाँच सय मिटर पश्चिमतर्फ मधेश प्रदेश ०३–५१–००२ स ४३५७ नम्बरको लोडर अनियन्त्रित भएर दुर्घटना हुँदा चालकसहित १० जना सामान्य घाइते भएका थिए । प्रहरी चौकी परवानीपुरका अनुसार क्षमताभन्दा बढी यात्रु बोकेको र तीव्र गतिका कारण दुर्घटना भएको हो ।
दुर्घटनापछि घाइतेहरूलाई प्रहरीको सहयोगमा एम्बुलेन्समार्फत वीरगंज–१४ बहुवरीस्थित स्पर्श मल्टिस्पेसलिटी अस्पताल लगिएको थियो । तर घाइतेहरूले आफूहरूलाई सरकारी अस्पताल लैजान आग्रह गर्दा पनि एम्बुलेन्सले सिधै निजी अस्पताल पुर्याएको बताएका छन् ।
घाइतेहरूको भनाइ अनुसार सामान्य उपचारपछि अस्पतालले अत्यधिक शुल्कको बिल थमाएको थियो । किशोरी सहनीले हातमा सामान्य चोट लागेको उपचारका लागि २० हजार ९ सय रुपैयाँको बिल दिइएको बताइन् । उनका अनुसार कुनै औषधिसमेत नदिई यति ठूलो रकम मागिएको थियो ।
यस्तै प्रेम सहनीलाई दुई बोतल स्लाइन, दुईवटा सुई र दुईवटा एक्सरे गरेको भन्दै २३ हजार ९ सय रुपैयाँको बिल दिइएको थियो । सुरेन्द्र मुखियाले सामान्य चोटपटकको उपचारमै २५ हजार रुपैयाँको बिल देखाइएको बताए ।
लंगटु सहनीले आफूलाई स्लाइनसमेत नचढाइएको दाबी गर्दै ४५ हजार रुपैयाँको बिल दिइएको बताए । बिगा सहनीले एक बोतल स्लाइन चढाएको भरमा २३ हजार १ सय रुपैयाँ र दीपक सहनीले २५ हजार रुपैयाँको बिल थमाइएको गुनासो गरे ।
घाइतेहरूका आफन्त र स्थानीय व्यक्तिहरू अस्पताल पुगेपछि बिलसम्बन्धी विवाद चर्किएको थियो । अस्पताल प्रशासनका अनुसार सुरुमा करिब २ लाख ८० हजार रुपैयाँ पुगेको कुल बिल अन्ततः छुट दिएर ६५ हजार रुपैयाँमा मिलाइएको छ ।
अस्पतालका प्रशासन शाखा प्रमुख रूपक पटेलले अस्पतालले कसैलाई ठगी नगरेको दाबी गर्दै आर्थिक अवस्था कमजोर भएका बिरामीलाई आन्तरिक सहमतिअनुसार छुट दिइएको बताए । अस्पतालको सेवा र सुविधाका कारण बिरामीहरू उपचारका लागि आउने गरेको तथा उपचारमा कुनै लापरबाही नगर्ने उनको भनाइ छ ।
तर घाइते पक्षका सञ्जीव मिश्राले अस्पतालले गरिब बिरामीलाई अत्यधिक शुल्क तिर्न बाध्य बनाउने गरेको आरोप लगाए । उनका अनुसार सोधखोज र दबाबपछि मात्रै अस्पताल प्रशासन बिल घटाउन सहमत भएको हो । साथै दुर्घटनाका बिरामीलाई एम्बुलेन्समार्फत निजी अस्पतालमा पुर्याउने र पछि ठूलो रकम असुल्ने प्रवृत्तिमाथि सम्बन्धित निकायले छानबिन गर्नुपर्ने उनले माग गरे ।
