सेढवा । पर्साको जिराभवानी गाउँपालिकाले १७औँ गाउँसभामार्फत आर्थिक वर्ष २०८३/८४ का लागि ४० करोड ८३ लाख रुपैयाँको बजेट सार्वजनिक गरेको छ।

गाउँपालिका अध्यक्ष अनोज चौधरीले गाउँसभामा आगामी आर्थिक वर्षको बजेट तथा कार्यक्रम प्रस्तुत गर्दै शिक्षा, स्वास्थ्य, कृषि, सामाजिक विकास तथा भौतिक पूर्वाधार निर्माणलाई प्राथमिकतामा राखिएको बताए। प्रस्तुत बजेट अनुसार शिक्षा क्षेत्रको विकासका लागि २ करोड रुपैयाँ, स्वास्थ्य क्षेत्रका लागि १ करोड रुपैयाँ, कृषि विकासका लागि १ करोड ५० लाख रुपैयाँ, भौतिक पूर्वाधार विकासका लागि ५ करोड रुपैयाँ तथा सामाजिक विकासका लागि १ करोड ५० लाख रुपैयाँ विनियोजन गरिएको छ।

जिराभवानी गाउँपालिका–३ स्थित कृषि तथा पशुपन्छी सेवा केन्द्रको सभाहलमा अध्यक्ष चौधरीको सभापतित्वमा सम्पन्न गाउँसभामा प्रमुख प्रशासकीय अधिकृत अमित कुमार गिरीले कर्मचारीहरूलाई सेवाप्रति उत्तरदायी, पारदर्शी र इमानदार बन्न आग्रह गरे। उनले सेवाग्राहीलाई अनावश्यक दुःख दिने तथा गैरजिम्मेवार व्यवहार गर्ने कर्मचारीमाथि आवश्यक कारबाही गरिने चेतावनी समेत दिए।

कार्यक्रमका अवसरमा चालु आर्थिक वर्षमा उत्कृष्ट कार्यसम्पादन गरेका कार्यालय सहयोगी नागेन्द्र चौधरी र श्रीराम पटेललाई सम्मान गरिएको थियो।

गाउँसभामा उपाध्यक्ष रेखा चौधरी, वडाध्यक्षहरू रामशरण ख्वास, महादेव महतो थारु, सुरज राय थारु, राजेश्वर दास थारु, दारा सिंह राउत थारु, कार्यपालिका सदस्या सरोज चौरसिया तथा वडा सदस्य शंकर पटवारीलगायतले शुभकामना मन्तव्य व्यक्त गरेका थिए।

वक्ताहरूले वर्तमान जनप्रतिनिधिहरूको कार्यकालको अन्तिम गाउँसभा भएकाले विगतका उपलब्धि तथा चुनौतीहरूको समीक्षा गर्दै शिक्षा, स्वास्थ्य, कृषि, पूर्वाधार र समग्र विकासका क्षेत्रमा भएका कामको मूल्यांकन गर्नुपर्ने धारणा राखे। साथै आगामी दिनमा पनि जनअपेक्षा अनुरूप विकास निर्माणका कार्यलाई निरन्तरता दिनुपर्नेमा जोड दिएका थिए।

वीरगंज । मिडिया काउन्सिल मधेश प्रदेश, जनकपुरधामको आयोजनामा “स्वच्छ, विश्वसनीय र मर्यादित पत्रकारिताका लागि आचारसंहिता सम्बन्धी अभिमुखीकरण कार्यक्रम” बिहीबार वीरगंजमा सम्पन्न भएको छ।

वीरगंजस्थित होटल वृन्दावनमा आयोजित एकदिने कार्यक्रममा पत्रकारिताको विश्वसनीयता अभिवृद्धि, व्यावसायिक मर्यादा कायम तथा सञ्चार माध्यमप्रति जनविश्वास बढाउन पत्रकारले निर्वाह गर्नुपर्ने भूमिका र दायित्वबारे प्रशिक्षण प्रदान गरिएको थियो।

कार्यक्रममा नेपाल पत्रकार महासंघका पूर्व केन्द्रीय अध्यक्ष धर्मेन्द्र झाले सहजीकरण गर्दै प्रभावकारी सञ्चार सीप पत्रकारिताको आधारभूत आवश्यकता रहेको बताए। उनले सञ्चारका आधारभूत तत्वबारे पर्याप्त ज्ञान नहुँदा अन्योलता सिर्जना हुने जोखिम बढ्ने भएकाले पत्रकारले सर्वप्रथम सञ्चारका सिद्धान्त र प्रक्रियाबारे बुझ्नुपर्नेमा जोड दिए।

झाले पत्रकारिताले सामाजिक उत्तरदायित्व निर्वाह गर्नुपर्ने उल्लेख गर्दै तथ्य, सत्यता र निष्पक्षतालाई केन्द्रमा राखेर मात्र समाचार सम्प्रेषण गर्नुपर्ने बताए। “जे मन लाग्यो त्यही प्रकाशन वा प्रसारण गर्ने कार्य पत्रकारिता होइन,” उनले भने।

उनले पत्रकारितामा सत्यता, निष्पक्षता, उत्तरदायित्व, स्रोतको गोपनीयता तथा डिजिटल युगमा देखिएका चुनौतीबारे विस्तृत प्रशिक्षण दिएका थिए। प्रशिक्षणका क्रममा सहभागी सञ्चारकर्मीहरूलाई पत्रकार आचारसंहिताको प्रभावकारी कार्यान्वयन, तथ्यपरक समाचार सम्प्रेषण, गलत सूचना तथा भ्रामक सामग्री नियन्त्रण, सामाजिक सञ्जालको जिम्मेवार प्रयोग तथा व्यावसायिक पत्रकारिताका मूल्यमान्यताबारे जानकारी गराइएको थियो।

मिडिया काउन्सिलकी कार्यवाहक अध्यक्ष बन्दना झाको अध्यक्षतामा सम्पन्न कार्यक्रमको उद्घाटन मधेश प्रदेशका पूर्व मुख्यमन्त्री तथा प्रदेशसभा सदस्य लालबाबु राउत गद्दीले गरेका थिए।

कार्यक्रममा नेपाल पत्रकार महासंघका केन्द्रीय सचिव अशोक तिवारी, लेखा समिति संयोजक केसी लामिछाने, नेपाल पत्रकार महासंघ मधेश प्रदेशका अध्यक्ष श्याम बन्जारा, नेपाल पत्रकार महासंघका पूर्व केन्द्रीय सचिव तथा विश्व पत्रकार महासंघका दीपेन्द्र चौहान, पत्रकार महासंघ पर्साका अध्यक्ष ओमप्रकाश खनाल, मिडिया काउन्सिल सदस्य रिन्कु मिश्र, मन्नु पासवानलगायत सञ्चार क्षेत्रसँग सम्बन्धित विभिन्न व्यक्तित्वहरूको सहभागिता रहेको थियो।

अभिमुखीकरण कार्यक्रममा पर्सा जिल्लाका विभिन्न सञ्चार माध्यममा आबद्ध एक सयभन्दा बढी पत्रकार तथा सञ्चारकर्मीहरूको सहभागिता रहेको आयोजकले जनाएको छ।