वीरगंज । पर्साकाे पटेर्वा सुगौली गाउँपालिकाको आगामी आर्थिक वर्ष २०८३/०८४ को वार्षिक नीति तथा कार्यक्रम गाउँसभाको सत्रौँ अधिवेशनको पहिलो बैठकमा प्रस्तुत गरिएको छ ।
बुधबार आयोजित गाउँसभा बैठकमा गाउँपालिकाकी उपाध्यक्ष ममता महतोले नीति तथा कार्यक्रम पेश गर्दै स्वास्थ्य, शिक्षा, कृषि, सिँचाइ, रोजगार तथा पूर्वाधार विकासलाई प्राथमिकतामा राखेर बजेट तथा कार्यक्रम निर्माण गरिएको जानकारी दिइन् ।
गाउँपालिकाले “स्थानीय स्रोत, स्थानीय रोजगारी — एक गाउँ, एक उद्यम, एक पहिचान, हाम्रो अभियान” भन्ने मूल नारालाई केन्द्रमा राखेर आगामी वर्षका सम्पूर्ण आर्थिक तथा विकास गतिविधि सञ्चालन गर्ने नीति लिएको छ । पर्साको ऐतिहासिक तथा धार्मिक महत्व बोकेको श्री श्री १०८ श्री दुधेश्वरनाथ महादेव (भाथा बाबा) को नगरीका रूपमा परिचित गाउँपालिकाका नागरिकको आवश्यकता सम्बोधन गर्दै छिटो प्रतिफल दिने र न्यून स्रोतबाट अधिकतम क्षेत्र समेट्ने योजनालाई प्राथमिकता दिइएको उपाध्यक्ष महतोले बताइन् ।
उनले कार्यान्वयन गर्न नसकिने महत्वाकांक्षी योजना प्रस्तुत गरेर नागरिकमा भ्रम सिर्जना गर्नु भन्दा कार्यान्वयनयोग्य, संक्षिप्त तथा परिणाममुखी कार्यक्रमलाई प्राथमिकता दिइएको स्पष्ट पारिन् ।
अधिवेशनलाई सम्बोधन गर्दै गाउँपालिका अध्यक्ष दिनेश कुमार चौधरीले चालु आर्थिक वर्ष २०८२/०८३ मा हासिल भएका उपलब्धिबारे जानकारी गराए । उनले ग्रामीण क्षेत्रमा पहिलो पटक १५ शैयाको आधारभूत अस्पताल निर्माण सम्पन्न भई सञ्चालनमा आएको उल्लेख गर्दै उक्त अस्पताल मधेश प्रदेशकै गाउँपालिकाद्वारा निर्माण गरिएको पहिलो अस्पताल रहेको बताए ।
अस्पतालमा प्रत्येक महिनाको अन्तिम शुक्रबार स्त्रीरोग तथा बालरोग विशेषज्ञद्वारा सेवा प्रदान गरिँदै आएको, साथै आधुनिक ल्याब, भिडियो एक्स–रे, दन्त चिकित्सा तथा आयुर्वेद सेवा उपलब्ध रहेको अध्यक्ष चौधरीले जानकारी दिए । उनका अनुसार एनएसआई (NSI) सँगको सम्झौतापछि आगामी साउन महिनादेखि इको तथा शल्यक्रिया सेवा समेत सञ्चालनमा ल्याइनेछ । गाउँपालिकाले लागुऔषध दुव्र्यसन नियन्त्रणका लागि विशेष कार्यक्रम सञ्चालन गर्ने योजना समेत अघि सारेको छ ।
गाउँपालिकाले आगामी आर्थिक वर्ष २०८३/०८४ का लागि ४१ करोड १९ लाख ४४ हजार रुपैयाँ बराबरको बजेट सीमा निर्धारण गरेको छ । प्रमुख प्रशासकीय अधिकृत प्राण मेहताका अनुसार बजेटका स्रोतहरूमा संघीय समानीकरण अनुदानतर्फ ९ करोड ४० लाख, प्रदेश समानीकरण अनुदानतर्फ ६६ लाख, संघीय राजस्व बाँडफाँडतर्फ ८ करोड ८९ लाख ४४ हजार, प्रदेश राजस्व बाँडफाँडतर्फ ७५ लाख, संघीय विशेष अनुदानतर्फ १ करोड, संघीय समपूरक अनुदानतर्फ १ करोड २९ लाख, संघीय सशर्त अनुदानतर्फ १६ करोड ४० लाख, आन्तरिक स्रोततर्फ १ करोड ५० लाख तथा प्रदेशको अन्य अनुदानतर्फ १ करोड ३० लाख रुपैयाँ प्राप्त हुने अनुमान गरिएको छ ।
गाउँसभामा प्रस्तुत नीति तथा कार्यक्रममाथि छलफलपछि आगामी बैठकबाट बजेट पारित गरिने गाउँपालिकाले जनाएको छ । गाउँ सभामा वडाध्यक्ष, गाउँ सभा सदस्य सहित गाउँपालिकाका कर्मचारीहरुकाे उपस्थिती रहेकाे थियाे ।
