Date
मङ्ल, मंसिर १, २०८३
Tue, November 17, 2026
Home Blog Page 677

एक मतले विजयी वडाध्यक्ष कुर्मीसंग काम कार्यवाही नगर्नु, नगराउनु अदालतकाे आदेश

0

वीरगंज । एक मतले विजयी भएका पर्साकाे जगरनाथपुर गाउँपालिका वडा नं. ६ का वडाध्यक्ष अयाेध्या प्रसाद कुर्मीलाई वडाध्यक्षकाे हैसियतले कुनै पनि काम कार्यवाही नगर्नु, नगराउनु उच्च अदालतले अन्तरकालिन आदेश दिएकाे छ ।

अयाेध्याबाट एक मतले वडाध्यक्षमा पराजित भएका लक्षमण प्रसाद कुर्मीले दिएकाे मतगणना बदर गरी पुन: मतगणना गरी पाउँ मुद्दामा उच्च अदालत जनकपुर अस्थायी इजलास वीरगंजकाे इजलास नं. ४ का न्यायाधिश सीताराम मण्डलकाे एकल इजलाशले जेठ २० गते पेशी समेत ताेकी यस्ताे आदेश दिएकाे हाे ।

निर्वाचन आयाेग, जिल्ला निर्वाचन कार्यालय पर्सा समेतका विपक्षीहरुसंग अदालतले यसमा के कसाे भएकाे हाे ? निवेदककाे निवेदन माग बमाेजिमकाे आदेश किन जारी हुनु नपर्ने हाे ? आदेश जारी हुनु नपर्ने आधार र कारण भए खुलाई लिखित जवाफ समेत मागेकाे छ ।

यसका साथै जगरनाथपुर गाउँपालिका वडा नं. ६ काे मतगणना सम्बन्धि आवश्यक कागजात लिई जेठ २० गते हुने छलफलमा विपक्षीहरुलाई उपस्थित हुन अदालतले आदेश समेत दिएकाे छ ।  

नेपाली कांग्रेसका उम्मेदवार लक्षमणलाई एक मतले हराउँदै वडाध्यक्षमा नेकपा एमालेका अयाेध्या विजयी भएका थिए । अयाेध्याले ९०४ मत पाउँदा उनकाे निकटतम् प्रतिस्पर्धी लक्षमणले ९०३ मत पाएका थिए ।

यसैगरी पर्साका बिन्दबासिनी गाउँपालिकाकाे वडा नं. ३ काे वडाध्यक्षमा पनि एक मतले कांग्रेसका उम्मेदवार जय प्रकाश चाैरसियाले विजयी भएका थिए । ११८५ मत ल्याएर वडाध्यक्षमा विजयी भएका चाैरसियाका निकटतम् प्रतिस्पर्धी एमालेका हनिफ मियाँले ११८४ मत पाएका थिए । 

दुई महिलासहित ४३ जनाद्वारा रक्तदान

0

वीरगंज । सामाजिक संस्था सानो पाइलाको आयोजनामा बुधबार वीरगञ्जस्थित घण्टाघरमा रक्तदान कार्यक्रम सम्पन्न भएकाे छ । वीरगञ्जमा बढ्दै गरेको रगत अभावलाई परिपुर्ती गर्न आकस्मिक रुपमा आयाेजना गरिएकाे कार्यक्रममा २ जना महिलासहित ४३ जनाले रक्तदान गरेका छन् । 

सानो पाइलका रौनकराज सर्राफको संयोजकत्वमा भएकाे कार्यक्रममा रौनकराज सरार्फ, अनिषा अधिकारी, मिना श्रेष्ठ, नवीन कुमार कायस्थ, विनय जयसवाल, रमेश यादव, दिपक पण्डित, मिराज मिया, मनाेज साह लगायतले रगतदान गरेको रक्तसञ्चार केन्द्र वीरगञ्जका प्रमुख सौरभराज पाण्डेले जानकारी दिए । 

रक्तदान कार्यक्रममा रक्त सन्चार केन्द्र वीरगंजका प्राविधीक सहायक जितेन्द्र कुशवाहा नेतृत्वको टोलीले प्राविधिक सहजिकरण गरेको रेडक्रस पर्साका राजन श्रीवास्तवले वताए । 

वीरगंजमा सत्तारुढ गठबन्धनकाे विजय जुलुश

0

वीरगंज । वीरगंज महानगरपालिकामा पाँच दलीय गठबन्धनका उम्मेदवारहरु विजयी भएपछि बुधबार निकालिएकाे विजयी जुलुश सम्पन्न भएकाे छ । 

वीरगञ्ज महानगरको मेयरमा गठबन्धनबाट साझा उम्मेदवार बनेका जनता समाजवादी पार्टी नेपालका राजेशमान सिंह र नेपाली कांग्रेसका इम्तियाज आलम विजयी भएपछि नगरवासीलाई धन्यवाद दिँदै खुसियाली मनाउन बुधबार विजय जुलुस निकालिएको थियाे ।

पाँच दलीय गठबन्धनका नेताहरुको सहभागितामा बुधबार दिउँसो आदर्शनगर रंगशालाबाट संयुक्त विजय जुलुश निकालिएको हो ।

संयुक्त विजय जुलुशमा नवनिर्वाचित मेयर सिंह, उपमेयर आलम, मधेश प्रदेशका मुख्यमन्त्री लालबाबु राउत, सङ्घीय सांसद प्रदीप यादव, प्रदेशसभा सदस्य जनत अन्सारी, काँग्रेसका जिल्ला उपसभापति रामनारायण कुर्मीका साथै जसपा, काँग्रेस, माओवादी र नेकपा एसका नेता कार्यकर्ता र समर्थकहरुकाे सहभागिता रहेकाे थियाे ।

जुलुसले महानगरका विभिन्न वडाहरुको परिक्रमा गर्ने योजना रहेको जसपाका जिल्ला सचिव तबरेज अहमदले जानकरी दिए ।

आदर्शनगरबाट शुरु भएको गठबन्धनको विजय जुलुश घडिअर्वा, घण्टाघर, मुर्ली चोक, पावरहाउस चोक, गण्डक चोक हुँदै परवानिपुर पुगेको थियाे । त्यसपछि जुलुस परवानीपुरबाट जितपुर हुँदै वीरगञ्ज महानगरको टेढा, सोलाखपुर, मिलनचोक, कट्गेनवा, बेलवाचोकबाट लालपर्सा, जगरनाथपुर, भवानीपुर, मनियारी आएर त्यहाबाट प्रसौनिबिर्ता, सबैठ्वा, रामगढवा, सिर्सिया, खल्वाटोला, इनरवा हुँदै नगवा, भेडियाही, लक्षमणवाम चोेकमा पुगेर सम्पन्न भएकाे थियाे ।

सबै मिलेर गाउँकाे बिकास गराैं : गापा अध्यक्षका उम्मेदवार सिंह

0

वीरगंज । पर्साकाे छिपहरमाई गाउँपालिका वडा नं. ३ का वडाध्यक्ष दिपेन्द्र सिंहले बुधबार पदभार ग्रहण गरेका छन् । गाउँ कार्यपालिकाकाे कार्यालय भिस्वामा भएकाे सपथ ग्रहण पश्चात वडा कार्यालय जयमंगलापुरमा पुगेर वडाध्यक्ष दिपेन्द्रले पदभार समेत ग्रहण गरेका थिए ।

त्यस अघि नेपाली कांग्रेस पर्साका सह सचिव नविन सिंहले वडा कार्यालयकाे रिबन काटेर उद्घाटन गरेका थिए ।

त्यसपछि कांग्रेसबाट नै वडाध्यक्षमा निर्वाचित दिपेन्द्रलाई गाउँपालिका अध्यक्षका उम्मेदवार समेत रहेका सह सचिव सिंहले फुल माला र अविरकाे टिका लगाएर बधाई तथा सफल कार्यकालकाे शुभकामना समेत दिएका थिए ।

साे अवसरमा वाेल्दै सह सचिव सिंहले वडाबासीकाे चाहना अनुसार काम गर्न वडाध्यक्षलाई आग्रह गरे । उनले वडा बासीकाे समस्याकाे पहिचान गरी साेही अनुसारकाे प्राथमिकता निर्धारण गरेर काम गर्नु पर्ने सह सचिव सिंहले सुझाए । 

उम्मेदवार सिंहले सबै मिलेर गाउँपालिका विकास गर्नु पर्ने वताए । आफु निर्वाचन हारे पनि सधै जनताकाे सेवामा रहने वताउँदै सिंहले सबै मिलेर नमुना गाउँपालिका बनाउनु पर्ने धारणा राखे ।

यसैगरी छिपहरमाई गाउँपालिका वडा नं. ४ का वडाध्यक्ष रामेश्वर महताेले पदभार ग्रहण गरेका छन् । कांग्रेसबाट वडा अध्यक्षमा निर्वाचित महताेलाई पनि सह सचिव सिंहले फुल माला र अविरकाे टिका लगाएर बधाई तथा सफल कार्यकालकाे सुभकामना दिएका थिए ।   

जगरनाथपुरका जनप्रतिनिधिहरुलाई अध्यक्ष यादवले खुवाए सपथ

0

वीरगंज । पर्साको जगरनाथपुर गाउँपालिकाका नवनिर्वाचित जनप्रतिनिधिहरुले बुधबार सपथ ग्रहण गरेका छन् । गाउँ कार्यपालिकाको कार्यालय जगरनाथपुरमा भएको सपथ ग्रहण तथा सम्मान कार्यक्रममा गाउँपालिका अध्यक्ष श्रीकान्त यादवले उपाध्यक्ष, वडाध्यक्षसहितका ३२ जना नवनिर्वाचित जनप्रतिनिधिहरुलाई सपथ खवाए ।

अध्यक्ष यादवले उपाध्यक्ष बबिता सिंह, वडा नं. १ का वडाध्यक्ष लक्ष्मी साह तेली, २ का वडाध्यक्ष नेपाली प्रसाद कुशवाहा, ३ का वडाध्यक्ष सुभाष यादव, ४ का वडाध्यक्ष प्रभु प्रसाद नुनिया, ५ का वडाध्यक्ष बिहारी प्रसाद नुनिया, ६ का वडाध्यक्ष अयोध्या पटेल लगायका नवनिर्वाचित जनप्रतिनिधिहरुलाई सपथ खुवाएका हुन ।

यस अघि जेठ ९ गते साेमबार नै जिल्लाकाे सदरमुकाम वीरगंजस्थित जिल्ला समन्वय समिति पर्साकाे सभा हलमा भएकाे १३ पालिकाका प्रमुखहरुकाे सपथ ग्रहण कार्यक्रममा अध्यक्ष यदावले सपथ ग्रहण गर्नुकाे साथै साेही दिन गाउँ कार्यपालिकाकाे कार्यालय जगरनाथपुरमा पुगी पदभार समेत ग्रहण गरेका थिए ।

नवनिर्वाचित जनप्रतिनिधिहरुकाे सपथ ग्रहण तथा सम्मान कार्यक्रममालाई सम्बाेधन गर्दै अध्यक्ष यादवले आफु मेयर नभएर जनताकाे सेवक भएकाे वताए । उनले भने “मलाई जनताले जुन विश्वासका साथ आफ्नाे मत दिएर जिताएका छन् । त्याे म टुटन दिदैन, सधै म मेयर हाेइन जनताकाे सेवक भएर काम गर्छु ।”

अध्यक्ष यादवले मेराे पहिलो प्रथामिकता शिक्षामा सुधार र दोस्रो प्राथमिकता स्वास्थ्य रहेको वताए । त्यसकाे साथ साथै आफुले कृषी, राेजगारी लगायतकाे क्षेत्रमा काम गर्ने वताए । भ्रष्टाचारको सवालमा शून्य सहनशिलता अपनाउने अध्यक्ष यादवको भनाई थियाे ।

कार्यक्रममा प्रमुख अतिथी नेपाली काँग्रेस पर्साका सभापती जनार्दन सिंह क्षेत्रीले नवनिर्वाचित जनप्रतिनिधिहरुलाई जनताको मालिक बनेर होईन जनताको सेवक भएर काम गर्न सुझाव दिए । उनले भने, जनताको विश्वास जित्न सफल भएनौ भने, आउँने चुनावमा जनताले स्वीकार्य गर्न सक्दैन् त्यसैले गाउँपालिकालाई भ्रष्टचार मुक्त बनाई जनताको सेवामा लिप्त भएर काम गर्नुपर्छ ।

उनले गाउँपालिकाको विकास निर्माणको काम पारदर्शि हुनुपर्छ, कामकाजलाई थप प्रभावकारी र प्रारदर्शि बनाउँन कार्यालयमा वाडा नागरिक पत्र राख्ने, बजेट छुट्याउँदा र ठेक्का सकार हुदाँ त्यसको लागत ईस्टिमेट सार्वजनिक गर्ने र विगतको दिनमा गाउँपालिकामा भएको भ्रष्टचारलाई सार्वजनिक गर्न पूर्वाग्रही नभएर जसले गलत गरेको त्यसलाई जनताको माझ सार्वजनिक गर्नु पर्ने बताए ।

गाउँपालिका अध्यक्ष यादवको अध्यक्षतामा भएको कार्यक्रममा नेपाली काङ्ग्रेसका मधेश प्रदेशका महामन्त्री बृहस्पति कृष्ण श्रेष्ठ, पर्सा जिल्ला समितिका प्रवक्ता रमेश पाण्डे, गाउँपालिकाका प्रमुख प्रशासकीय अधिकृत राजु साह लगायकाले नवनिर्वाचित जनप्रतिनिधिलाई बधाई तथा सफल कार्यकालको शुभकामना ब्यक्त गरेका थिए ।

सपथ ग्रहण पश्चात आ आफ्नाे वडा कार्यालयमा पुगेर वडाध्यक्षहरुले आजै पदभार समेत ग्रहण गरेका थिए ।

सपथ ग्रहण कार्यक्रममा पश्चात अध्यक्ष यादवले गाउँ कार्यपालिका कार्यालयका कर्मचारीहरुसंग छलफल समेत गरेका थिए । छलफलकाे क्रममा अध्यक्ष यादवले सबै शाखा प्रमुखहरुलाई ५ दिन भित्र आफ्नाे कार्ययाेजना प्रमुख प्रशासकिय अधिकृत कहाँ पेश गर्न निर्देशन दिए ।

यसैगरी छिपहरमाई गाउँपालिका, धाेबिनी गाउँपालिका, पकहा मैनपुर गाउँपालिका, पटेर्वा सुगाैली गाउँपालिकाका नवनिर्वाचित जनप्रतिनिधिहरुले पनि बुधबार नै सपथ ग्रहण गरेका छन् ।

छिपहरमाईमा गाउँपालिका अध्यक्ष मनाेज गुप्ता, धाेबिनीमा गाउँपालिका अध्यक्ष मदन चाैहान, पकहा मैनपुरमा गाउँपालिका अध्यक्ष सुरेश मेहता, पटेर्वा सुगाैलीमा गाउँपालिका अध्यक्ष दिनेश चाैधरीले सम्बन्धित पालिका उपाध्यक्ष, वडाध्यक्षका लगायतका नवनिर्वाचित जनप्रतिनिधिहरुलाई सपथ खुवाएका हुन् ।  

ढुंगा प्रहारले युवकाे हत्या गरेकाे अभियाेगमा ३ जना पक्राउ

0

वीरगंज । २३ बर्षे युवकको हत्या अभियाेगका फरार ३ जनालाई प्रहरीले पक्राउ गरेकाे छ । एक १७ बर्षिय किशाेरसहित पर्साकाे ठोरी गाउँपालिका वडा नं.५ ठुलो बाघमोर्चा निवासी २२ बर्षिय सरोज स्याङ्वो र वीरगंज महानगरपालिकाकाे वडा नं.३२ रामबन निवासी २० बर्षिय किशन लोप्चनलाई प्रहरीले नियन्त्रणमा लिएकाे हाे ।

जेठ ५ गते ठाेरी गाउँपालिकाकाे वडा नं.५ बाघमोर्चा मन्दिरको छेउमा अज्ञात व्यक्तिहरूले ढुंगाले टाउँको र अनुहार समेतमा प्रहार गरी साेही ठाउँ निवासी २३ बर्षिय प्रविण पाख्रिन गरेकाे हत्यामा सलंग्न ३ जनालाई पक्राउ गरिएकाे जिल्ला प्रहरी कार्यालय पर्साले जनाएकाे छ ।

ढुंगाले टाउँको र अनुहार समेतमा प्रहार गरी पाख्रिनको मृत्यु भएको घटनाको अनुसन्धानको क्रममा एक जना १७ बर्षीय किशोरलाई मिति २०७९।०२।०७ गते नियन्त्रणमा लिई ज्यान सम्बन्धी कसूरमा अनुसन्धान भैरहेकोमा उक्त घटनामा सलंग्न भई फरार रहेका अन्य दुई जनालाई काठमाण्डौ महानगरपालिकाकाे वडा नं.३ महाराजगञ्जबाट पक्राउ गरिएकाे जिल्ला प्रहरी कार्यालय पर्साका प्रवक्ता प्रहरी नायब उपरिक्षक ओमप्रकाश खनालले जानकारी दिए ।

तिनै जनालाई जिल्ला प्रहरी कार्यालयकाे हिरासतमा राखी अनुसन्धान भइरहेको प्रवक्ता खनाले वताए ।

वीरगंज महानगरमा गठबन्धनकाे जित, मेयरमा सिंह र उप मेयरमा आलम

0

वीरगंज । मधेश प्रदेशको एक मात्र वीरगंज महानगरपालिकामा पाँचदलीय गठबन्धन विजयी भएकाे छ । गठबन्धनकाे तर्फबाट मेयरमा जनता समाजवादी पार्टी(जसपा)का राजेशमान सिंह र उप मेयरमा नेपाली कांग्रेसका इम्तियाज आलम विजयी भएका हुन् ।

राजेशमानले आफ्नो निकटम प्रतिस्पर्धी निर्वतमान मेयर एवम् नेकपा एमालेका उम्मेदवार विजय कुमार सरावगी भन्दा झन्डै दोब्बर मत ल्याएर विजयी भएका हुन् । मंगलबार विहान सकिएकाे ३२ वटै वडाकाे अन्तिम मतगणना नतिजा अनुसार राजेशमानले  ४६ हजार २१५  मत पाउँदा विजयले २३ हजार  ६७१ मतमात्रै पाए ।

अघिल्लो पटक तत्कालीन राष्ट्रिय जनता पार्टी (राजपा) नेपालबाट मेयरमा उठेका राजेशमान सरावगीसँग पराजित भएका थिए । तत्कालीन संघीय समाजवादी फोरमबाट मेयरमा उठेका विजयले १९, ३९३ मत ल्याउँदा राजेशमान १२, १६५ मत ल्याएर तेस्रो भएका थिए ।

यसपटक दुवैले दल बदलेर चुनावी मैदानमा आएका थिए । राजेशमान लोकतान्त्रिक समाजवादी पार्टी त्यागेर जसपामा पुगेका हुन् भने विजय जसपा त्यागेर एमालेबाट उम्मेदवार बनेका थिए ।

राजेशमान एमालेमा जाने लगभग निश्चित भइसकेको थियो तर एमालले विजयलाई पार्टी प्रवेश गराएपछि उनी जसपामा गए । विजय कांग्रेसमा जान चाहेपनि वास्था नभएपछि एमालेमा गएर मेयर लडेका थिए ।

त्यसैगरी वीरगञ्जको उपमेयरमा पाँच दलीय गठबन्धनबाट नै कांग्रेसका आलम निर्वाचित भएका छन् । आलम आफ्नो निकटम प्रतिद्वन्दी लोकतान्त्रिक समाजवादी पार्टी (लाेसपा) पुरुषोत्तम लाल झा भन्दा तेब्बर मतले विजयी भएका हुन् ।

कांग्रेसका इम्तियाज आलमले ३० हजार ७८ मत ल्याएका छन् भने प्रतिद्वन्द्वी लोसपाका झा ९ हजार ५ सय ६८ मत ल्याएर आफ्नो जमानत बचाउन सफल भएका छन् । आलमले झालाई २० हजार ५ सय १० मतले पराजित गरेका हुन् । आलम कांग्रेस पर्साका जिल्ला सचिव पनि हुन् ।

वीरगञ्जमा एक लाख २४ हजार ६४७ मतदाता रहेकोमा ७५.२४  प्रतिशत अर्थात ९३ हजार ७ सय ८२ मत खसेको थियो ।

सपथ लिएको २४ घण्टा भित्र वीरगंजबासीले परिवर्तनको आभाष गर्छन : नवनिर्वाचित मेयर सिंह

वीरगञ्ज महानगरपालिकाका नवनिर्वाचित मेयर राजेशमान सिंहले महानगरमा अनियमित तरिकाले गरिएका कामहरुको छानविन गरिने बताएका छन् ।  महानगरमा भएका सम्पूर्ण कामको छानविन गर्दै अनियमितता भएको भेटिएको खण्डमा अख्तियारमा फाइल पठाएर कारवाहीको अगाडि बढाउने सिंहले बताएका हुन् । 

मंगलबार बिहान  मेयरमा निर्वाचित भएको प्रमाणपत्र ग्रहण गरेपश्चात मतगणनास्थलमा सञ्चारकर्मीहरुसँग कुराकानी गर्दै नवनिर्वाचित मेयर सिंहले भने, ‘महानगरमा यसअघिका जनप्रतिनिधिले जति पनि भ्रष्टचा गरेका छन्, ती सबै फाइल अख्तियारमा पठाउँछु, अख्तियारले छानबिन गरेर कारवाही अगाडि बढाउछ ।’

त्यस्तै आफूले सपथ लिएको २४ घण्टा भित्र वीरगञ्ज महानगरपालिकाका वासिन्दाले परिवर्तनको आभाष गर्ने सिंहले बताए । ‘जुन दिन मैले शपथ लिन्छु त्यसको २४ घण्टाभित्र जनतालाई परिवर्तनको अनुभुति हुने गरि काम गरेर देखाउँछु । वीरगञ्जवासीले दैनिक भोगिरहेका समस्या सामधान नै मेरो पहिलो र मुख्य प्राथमिकता हुनेछ,’ उनले भने ।

वीरगञ्जको सरसफाई, पानीको उचित निकास गर्दै शहरमा हुने डुबान समस्यालाई समाधान गर्नु पनि आफ्नो पहिलो काममध्ये हुने उनले बताए । त्यसैगरी सिंहले करको दर न्यूनीकरण, सहज र सुलभ स्वास्थ्य सेवा, शिक्षा, रोजगारी लगायतका विषयमा विशेषज्ञ र विज्ञहरुसँग परामार्श गरेर नगरवासीको हितमा निर्णय लिने प्रतिक्रिया दिए  ।

सिंहले पाँच वर्षको आफ्नो कार्यकालमा चुनावी प्रतिबद्धता पत्रमा लेखिएको भन्दा पनि बढी काम गरेर देखाउने प्रतिबद्धता पनि व्यक्त गरे  ।

शहिदको शालिकमा माल्यार्पण

वीरगंज महानगरकाे मेयरमा निर्वाचित भएपछि सिंहले शहिदको शालिकमा माल्यार्पण गरेका थिए । 

मतगणनास्थल वीरगञ्ज महानगरपालिका वडा नम्बर १४ स्थित श्री नृसिंह माविबाट निस्किएको बिजयी जुलुश वीरगञ्जको बिपि उद्यानस्थित शहिद स्मृती पार्कमा पुगेर नवनिर्वाचित मेयर सिंहले शहिदका शालिकमा माल्यार्पण गरेका थिए । 

मधेश आन्दोलनताका आफ्नो प्राणको आहुति दिएका सम्पुर्ण शहिदहरुको सम्झना गर्दै शहिदको सपनालाई साकार पार्ने प्रतिबद्धता पनि उनले व्यक्त गरे । 

साथै उनले घण्टाघरस्थित नेपालमा मधेश मुद्दा उठाउने पहिलो व्यक्तिमध्ये एक रामजनम तिवारीको शालिकमा पनि माल्यार्पण गर्दै श्रद्धा सुमन अर्पण गरेका थिए । 

शहिद तथा मधेश आन्दोलनका घाइतेहरुको लागि पनि विशेष योजना बनाएर काम गर्ने विश्वास पनि दिलाए । शहिदको त्याग र बलिदानबाट  प्राप्त उपलब्धीको संरक्षण गर्दै आम वीरगञ्जबासीलाई शहिदको सपना पूरा भएको प्रत्याभुती दिलाउने सिंहको भनाई छ ।

वडा सदस्यदेखी मेयर सम्म कसरी पुगे राजेशमान ?

पर्साको वीरगञ्ज महानगरपालिका वडा नम्बर ३ छपकैया निवासी बुबा भुपेन्द्रमान सिंह र आमा रुकमिनि देवी श्रेष्ठका कान्छो सन्तान हुन् राजेशमान सिंह । विक्रम सम्वत् २०२७ सालमा जन्मिएका उनका एक दिदि र एक दाजु छन् । सिंहले घर नजिकै रहेको मुलुककै पूरानो मध्यमा पर्ने त्रिजुद्ध महाविर प्रसाद रघुविर राम माद्यामिक विद्यालयबाट २०४२ सालमा एसएलसी परीक्षा उतीर्ण गरेका छन् । 

२०४३ सालमा वीरगञ्जकै ठाकुरराम बहुमुखी क्याम्पसमा आर्ट्स संकायमा भर्ना भएका उनले ठाकुररामबाटै प्रविणता प्रमाणपत्र तह (आईए) उतीर्ण गरेका थिए । त्यसपछि औपचारिक शिक्षालाई विराम दिएका सिंहले नेपाली कांग्रेसको शुभेच्छुक संगठन नेपाल विद्यार्थी संघबाट राजनितिक यात्राको आरम्भ गरे । नेविसंघको पर्सा जिल्ला सदस्य हुँदै आरम्भ भएको राजनैतिक जीवन सिंहले थुप्रै आरोह अवरोहहरु पार गरेका छन् । 

मिलनसार, स्पष्ट वक्ता र बोलेको कुरामा अडिग रहने सिंहको व्यक्तित्वका कारण २०५४ सालमा सम्पन्न स्थानिय तहको निर्वाचनमा नेपाली कांग्रेसको तर्फबाट उनी तत्कालिन वीरगञ्ज उपमहानगरपालिका वडा नम्बर ३ छपकैयाको वडा सदस्यमा निर्वाचीत भए ।

सामाजिक कार्यमा पनि उत्तिकै सक्रिय रहने सिंह २०६० सालमा भएको निर्वाचनमा सावीक वीरगञ्ज उपमहानगरपालिका वडा नम्बर ३ को वडाध्यक्षमा निर्वाचीत भए । 

पछिल्लो एक दशक देखी मधेश र मधेशी समुदायको हक अधिकारका लागि सिंह निरन्तर लड्दै आएका छन् । मुलुकमा भएका सवैखाले परीवर्तनकारी आन्दोलनमा सहभागि भएका सिंह राज्यले मधेशी समुदायमाथी गरेको विभेदको विरुद्ध निरन्तर लड्दै आए । पछिल्लो मधेश आन्दोलनको नेतृत्वदायी भूमिकाले उनको नेतृत्व अझ सशक्त बन्दै गयो ।

जनस्तरमा स्थापित भएका सिंहको केन्द्रिय राजनितिमा पनि प्रभाव बढ्दै जाँदा उनी राष्ट्रिय मधेश समाजवादी पार्टीको केन्द्रिय महासचीवमा चयन भए । सोहि पार्टीबाटै सिंह २०७० सालको संविधानसभा निर्वाचनको प्रत्याशी पनि बने । पछि उक्त पार्टी एकिकरण भई बनेको राष्ट्रिय जनता पार्टीको पनि महासचिव नै बनाउनुले उनको नेतृत्वदायी भूमिका झनझन निखारिदै गएको स्पष्ट हुन्छ ।

२०७४ सालको स्थानिय तहको निर्वाचनमा पनि उनी राजपाबाट वीरगञ्ज महानगरपालिकाको मेयर पदका प्रत्याशी बने । आफ्नो राजनितिक शक्ति निरन्तर बढाउँदै लगेका सिंहले वीरगञ्जका स्थापित नेतालाई समेत पछि पार्दै लोकप्रिय मत सहित तेश्रो स्थानमा रहँदा पनि निरन्तर जनताकै माझमा सक्रिय रहे । 

राष्ट्रिय जनता पार्टी समेत एकिकरण भई जनता समाजवादी पार्टी नेपालमा रहेका सिंह कालान्तरमा उक्त पार्टी फुटेर दुई चिरा हुँदा लोकतान्त्रिक समाजवादीमा रहेपनि पुनः जसपामै फर्किएका छन् । साहिब दरवार सेवा संस्थान मार्फत जनताको सुख दुःखमा जोडिँदै आएका सिंहले कोरोना महामारीका बेला यहाँका गरीब विपन्न र असहायहरुलाई निःशुल्क भोजन गराएका थिए ।

हजारौँ आमाबुवाहरुको आँखाको अप्रेशन गराई ज्योति फर्काएका छन् । सामाजिक क्षेत्रमा प्रतिष्ठित संस्था रिलिफ सोसाईटी अफ कमर्सले उनको सामाजिक कामको उच्च मूल्यांकन गर्दै ‘विहारी लाठ कर्मवीर सम्मान’ले सम्मानीत समेत गरेको छ । 

संस्थाले मात्रै हैन, समग्र वीरगञ्जबासीले पनि उनलाई सम्मान गरेका छन् । जनताको मन र मत जितेर उनी स्थानीय सरकार स्थापनापश्चातको दोस्रो मेयरको रुपमा ऐतिहासिक मत ल्याउँदै निर्वाचित भएका छन् ।

१३ वडामा जसपा, ९ वडामा कांग्रेस र ८ वडामा एमाले विजयी

३२ वटा वडा रहेकाे वीरगंज महानगरपालिकाकाे १३ वटा वडामा जसपा, ९ वटामा कांग्रेस, ८ वटामा एमाले र २ वटामा लोसपाले जितेको छ ।

वडा नं १ मा जसपाका मनोज राउत कुर्मी, २ मा कांग्रेसका रियाज मिया तेली, ३ मा जसपाका बैजुलाल स्वर्णकार, ४ मा कांग्रेस जगत साह कानु, ५ मा एमाले प्रदीप चौरसिया, ६ मा लोसपामा जयप्रकाश अग्रवाल, ७ मा कांग्रेसका हिराकाजी महर्जन, ८ मा कांग्रेसकै रितेश गुप्ता, ९ मा जवहारप्रसाद गुप्ता र १० मा जसपाका सुशीलकुमार गुप्ता विजयी छन् ।

स्तै, ११ मा जसपाका अजय चौरसिया, १२ मा एमालेका सुरेश गुप्ता कानु, १३ मा एमालेकै हारा गिरी, १४ मा जसपाका महबुब एलाही, १५ मा जसपाकै रमेश यादव, १६ मा परशुराम चौरसिया, १७ मा एमालेका सञ्जिव क्षेत्री, १८ मा जसपाका उमाशंकर तिवारी, १९ मा कांग्रेसका मुकेशकुमार चौरसिया विजयी भएका हुन् ।

वडा नम्बर २० मा एमाले राम किशोर सिंह, २१ लोसपाका राधाकृष्ण रौनियार, २२ कांग्रेसका द्वारिका महतो, २३ एमालेको अवध किशोर कुशवाहा, २४ मा एमालेकै विजयप्रसाद कुर्मी, २५ मा जसपाका आशुतोष चतुर्वेदी, २६ मा कांग्रेसका शम्भुप्रसाद गुप्ता, २७ मा कांग्रेकै हृदय नारायण पटेल, २८ मा सर्युग महतो, २९ मा जसपाका धर्मेन्द्र महतो, ३० मा जसपाकै मनोजकुमार यादव, ३१ मा एमालेका जितेन्द्र यादव  र ३२ मा जसपाका रियाज मिँया ठकुराई विजयी भएका छन् ।