वीरगंज । वीरगंजस्थित नारायणी अस्पतालमा उपचारका क्रममा एक बिरामीको मृत्यु भएपछि उनका आफन्त र स्थानीयले अस्पतालको आकस्मिक कक्षमा तोडफोड गरेका छन् ।
वीरगंज महानगरपालिका–२५ का ४५ वर्षीय राजकुमार पटेलको शनिबार उपचारकै क्रममा मृत्यु भएपछि आक्रोशित आफन्त र स्थानीयले बिहान करिब ११ बजे आकस्मिक कक्षमा प्रवेश गरी होहल्ला गर्दै तोडफोड गरेका हुन् ।
मृतकका आफन्तले चिकित्सकको लापरबाहीका कारण राजकुमार पटेलको मृत्यु भएको आरोप लगाउँदै विरोध प्रदर्शन गरेका थिए । प्रदर्शनका क्रममा आकस्मिक कक्षमा तोडफोड हुनुका साथै एक जना घाइते भएको प्रत्यक्षदर्शीहरूले बताएका छन् ।
घटनापछि अस्पताल परिसर केहीबेर तनावग्रस्त बनेको थियो । शान्ति सुरक्षाका लागि अस्पताल परिसरमा बाक्लाे संख्यामा प्रहरी परिचालन गरिएको छ ।
वडा प्रहरी कार्यालयका प्रमुख विक्रम सुवेदीका अनुसार उपचारका लागि अस्पताल ल्याइएका पटेलको मृत्यु के कारणले भयो भन्ने विषयमा अहिलेसम्म स्पष्ट हुन सकेको छैन । घटनाबारे थप अनुसन्धान भइरहेको प्रहरीले जनाएको छ ।
