वीरगंज । रौतहटको गुजरा नगरपालिका–५ हरिहरपुर टोलमा शुक्रबार धारिलो हतियार (खुकुरी) प्रहारबाट एक महिलाको हत्या भएको छ ।
मृतक स्थानीय चन्देश्वर साह कलवारकी श्रीमती अन्दाजी ४५ वर्षीया रेनु देवी जयसवाल रहेको प्रहरीले जनाएको छ ।
प्रहरीका अनुसार बारा जिल्लाको करैयामाई गाउँपालिका–८ ईटहर बेलाही टोल घर भई हाल सोही टोलमा बस्दै आएका अन्दाजी ३५ वर्षीय उपेन्द्र साह कलवारले रेनु देवीमाथि खुकुरी प्रहार गरेका थिए । धारिलो हतियारको गम्भीर चोटका कारण उनको घटनास्थलमै मृत्यु भएको स्थानीयले बताएका छन् ।
घटनापछि आक्रोशित स्थानीय बासिन्दाले आरोपित उपेन्द्रलाई नियन्त्रणमा लिएर कुटपिट गरेका थिए । स्थानीयको कुटाइबाट गम्भीर घाइते भएका उनको चन्द्रनिगाहपुरस्थित चन्द्रपुर अस्पतालमा कडा सुरक्षा व्यवस्थाका बीच उपचार भइरहेको प्रहरीले जनाएको छ ।
जिल्ला प्रहरी कार्यालय रौतहटले घटनाको पुष्टि गर्दै घटनास्थलमा प्रहरी टोली परिचालन गरी मुचुल्का उठाउने तथा आवश्यक कानुनी प्रक्रिया अघि बढाइएको जनाएको छ ।
घटनाको कारण भने हालसम्म खुल्न नसकेको प्रहरीले जनाएको छ । घटनाबारे थप अनुसन्धान भइरहेको जिल्ला प्रहरी कार्यालय रौतहटका प्रहरी अधिकारीहरूले बताएका छन् ।
