वीरगंज । नेपाली कम्युनिष्ट पार्टी (नेकपा) को केन्द्रीय सदस्यमा पर्साबाट थप तीन जना मनोनित भएका छन् ।
पार्टीले पर्साका बलिराम साह, रामदरश कुशवाहा र हिरा भट्टराईलाई केन्द्रीय सदस्यमा मनोनित गरेको हो । उनीहरू तीनै जना तत्कालीन नेकपा (माओवादी केन्द्र) का पुराना नेता हुन् ।
नवनियुक्त केन्द्रीय सदस्यहरूले बुधबार मधेश प्रदेशको राजधानी जनकपुरधाममा आयोजित प्रदेश स्तरिय पार्टीको एकता बैठक तथा प्रशिक्षण कार्यक्रममा पद तथा गोपनीयताको शपथ ग्रहण गरेका छन् ।
पार्टीका केन्द्रीय संयोजक पुष्पकमल दाहाल ‘प्रचण्ड’ ले उनीहरूलाई पद तथा गोपनीयताको शपथ गराएका थिए । कार्यक्रममा पार्टीका सह–संयोजक माधवकुमार नेपालसहित शीर्ष नेताहरूको उपस्थिति रहेको थियो ।
पार्टीले केन्द्रीय समितिलाई थप सुदृढ बनाउने उद्देश्यका साथ विभिन्न जिल्लाबाट नयाँ सदस्यहरू मनोनित गर्ने क्रममा पर्साबाट पनि तीन जनालाई केन्द्रीय जिम्मेवारी दिएको जनाएको छ ।
